Ralkap In Chin Nunau 2 An Pawngsual Tum

Chin State, Mindat nunau 2 cu ralkap pawlin an pawngsual tum nan an hlawhsam thu theih a si. September 26 zan ah ralkap pawl cu harhdamnak ih hnaṭuantu tei inn sungah an va lutchilh ih innsang hmin cazin kan la ding tin an phuahhlam.

Thu an sut rero hnuah innleng ah rak suak hlah an ti, ralkap pawl cu innleng ah an suak lawk ih “Hi nu cu kan pu ta ding” tin an ṭong lai arak theihthup ruangah inn dunglam ihsin a tlansuak. Ralkap pawl cu inn sungah an va lutsal ih an hmu nawn lo ruangah inn sangka le innsung thilri, bungrua pawl an siatsuah.

Ralkap pawlin “Thaisun ah kan ra sal dingih na rak um lo asilen nan inn kan urkang ding” tin an au ciamco. Ralkap pawl ih au-aw cu kiangkap um pawl khalin an rak thei ve. Cumi hnuah inn dangah an fehsal ih fala kum 16 mi cu an inn ihsin an dirsuak, asinan kiangkap ih um pawlin suahsal dingin zangfah an dil ruangah an thlahsal.

Mindat khuami in, “Thilthleng ngaingai a si, Mindat ah internet pawl an phit thluh ruangah ralkap uico pawl cu nunrawng zetin an cangvai ciamco. Himi thubuai 2 lawng siloin hmun dang khalah kan theih loin pawngsualnak a thleng men thei. An hnen ah innsang cazin cu aum thluh, inn pakhat ah innsang member paziat an um ti khal an thei thluh. Minung um malnak inn ah an feh ih innsang cazin sut vekin an cangvai thok tum tla a si thei” a ti.

Thudang: Ralkap In Tleirawl Kum 14 Mi Telin Nunau 4 Cu A Burpin An Pawngsual. Sagaing, Kany ramsung ah ralkap pawlin nunau 4 an pawngsual zo, an pawngsual mi nauhak bik cu kum 14 mi a si ih upa bik cu kum 45 mi a si. June thla, July thla le September 16 sun ah a burpin an rak pawngsual.

Kany ramsung ah ralkap pawl cu umhmun an khuar ih phone line le internet pawl an phit thluh ruangah nunrawng zetin an cangvai rero. June thla ih an pawngsual mi cu fala kum 26 mi a si, July thla ih an pawngsual mi cu fala lengu kum 30 mi le kum 45 mi an si.

September 16 sun ih an pawngsual mi cu kumkim lo tleirawl kum 14 mi a si. Tleirawl kum 14 mi cu Chindwin tiva kap ah an pawngsual. Mibawmtu pakhat in “Pawngsual tongtu pawl cu an ningzak ruangah an relsuak ngam lo, naupai lo dingin siivai an ra dawt awk hnu lawngah kan theisuak” a ti.

Himi pawngsual thuhla thawn pehper in Khit Thit Media in pawngsual tongtu pawl cu an pehtlaih tum rero nan phone line le internet pawl an phit thluh ruangah thuhla cipciar in an sutfiah thei lo. Mibawmtu in an thuhla cu NUG cozah hnenah an sim thei zo ih pawngsualtu ralkap pawl khal an zingzoi rerp lai a ti.

Be the first to comment

Leave a Reply

Your email address will not be published.


*