Ralkap In Covid-19 Damlo 4 An Kai, Pakhat Cu CDM Tuah Ralkap A Si

Ralkap pawlin Mandalay, Kanaung Institute hmun ih um Covid-19 damlo 4 an kai thu theih a si. An kaihmi 4 pawl cu Covid-19 positive an si ih siizung an feh thei lo ruangah Kanaung Institute hmun ah an tuamhlawm.

Zan nazi 11:00 hrawngah an kai. Kanaung Institute ṭuanvo neitu in “Siizung an feh thei lo ruangah kan hnenah an um, an kaihmi pawl cu NLD sungṭuan an si.

Pakhat cu ralkap cozah duh lo ih CDM tuah ralkap officer Maj Soe Wai Hlaing a si. Maj Soe Wai Hlaing in Mandalay PDF pawl training a pe an ti. PDF pawl thawn pehtlaih awknak an nei lo, training khal an pe dah lo. Covid-19 in an damlo ruangah kan hnenah an um” a ti.

Ralkap in an kaihmi damlo, hliamtuar pawl cu an tuamhlawm dah lo ruangah seherh an um zet. March 2020 ihsin Myanmar ramsung ah Covid-19 damlo 150,000 zat an ngankhum zo ih mithi 3,269 zat an um tin ralkap ih control mi harhdamnak zung in a phuang.

Be the first to comment

Leave a Reply

Your email address will not be published.


*