Ralkap In Falam Peng, Khua Ṭhenkhat Ih An Rawl Suannak Bel Sungah Ek Le An Fangfai Retnak Ah Zun An Rak Thawh

Myanmar ralkap pawl hi minung mizia sinak khal an nei lo. Falam peng, Waibula ramsung ih khua 7 ah thuneihnak latu ralkap pawl cu tenum zetin an cangvai.

Ralkap pawl cu khuasung tlawnginn le biakinn sungah umhmun an khuar, mipi ran vulhmi pawl an thatsak ih an ei. June 29 sun ah Falam le Waibula karlak ah mipi kilhimtu CNDF le ralkap pawl an doaw ciamco ih mithi le hliamtuar khal an tam zet.

Khuasung mipi pawl cu ramlak ah an tlan ih ralkap pawlin an inn le lo an rak suasam. An rawl suannak bel sungah ek le an fangfai retnak ah zun an rak thawh, datsii khal an tawih ti a si.

Khuasung mi pakhat in “Kan tlungsal tikah innsung ih um thilri pawl cu hmang tlak nawn lo dingin an siatsuah thluh. An ruk theimi pawl cu an ru, TV le Computer pawl khal an ru” a ti.

Waibula kiangkap, khua 10 hrawngih khuasa minung 2000 hrawg cu ramlakah an tlan. Ṭhenkhat cu khuasung ah an kir, asinan July 7 zanlam ah ralkap 50 hrawng cu khua sungah an va lut ruangah mipi cu ramlak ah an tlansal thu theih a si.

Be the first to comment

Leave a Reply

Your email address will not be published.


*