Ralkap In June 1 Ah Tlawng An Ong Ding, Nikhatnak Chin Ramsung Ah Hmin Pe 1,796 An Um

Thuneihnak latu ralkap in June 1, 2021 ihsin nauhak pawl tlawng an kai thlang ding an ti. May 24 ihsin hmin pek a ngah an tiih Chin ramsung ah hmin pe 1.796 zat an um tin State Education Director in a phuang.

“Chin ram, Myone 7 sungih tlawng hmin pe cazin cu Primary Level ah 966, Middle Level ah 662 le High School Level ah 168 pawl an si. Tuisun cu hmin an ra pe tuk lo, May 31 tiang hmin pek a ngah. Nikhat hnu nikhat a thleng danglam vivo ding.

Hakha fimthiamnak lam ihsin in pekmi cazin cu KG ah 4, phunkhat ah 4, phunhnih ah 4, phunthum ah 2, phunli ah 11, an zaten kom in Primary Level ah 25 an si. Middle Level ahcun phunnga ah 1 lawng aum, cun phunkua le phunhra ah 1 veve an um. An zaten komin 28 an si.

Falam ramsung ih hmin petu zaten kom in Primary Level ah 244 an si, Middle Level ah 168, Middle Level cu phun 5, 6, 7 pawl an si. Tedim ramsung ih hmin cazin cu Primary Level ah 156, Middle Level ah 42 an si. High School Level ah hmin pe an um lo.

Tonzang ramsung ih hmin cazin cu Primary Level ah 107, Middle Level ah 85, High School Level ah 13 an si. An hmin cazin sungah an nulepai hmin a tello ruangah zo pawl an si ti kan thei lo. Ralkap in thuneihnak an lak hlanah Chin ramsung ah tlawng saya/sayama 13,000 hrawng an um.

CDM ih lut saya/sayam cazin cu 7,000 hrawng an si ding, cumi ah Mindat le Kanpetlet ramsung ih cazin a tello. Chin ramsung ah CDM lut tambik cu Hakha an si a ti. Tlawngkai dingih hmin pe pawl cazin cu Chinram, Myone 9 ta siloin Myone 7 ta lawng a si. Mindat le Kanpetlet cu an tello.

Be the first to comment

Leave a Reply

Your email address will not be published.


*