Ralkap In Kumkim Lo Nauhak Tete 73 An That Zo

Myanmar ram thuneihnak latu ralkap pawlin sualnak nei lo nauhak tete 73 an that zo thu Ministry of Human Rights of the National Unity Government (NUG) in a phuang. Feb.15-May 15 sungih an thatmi pawl a si.

Chin State, Mindat, Sagaing Region, Kani, Demoso le Kayah State doawknak khalah nauhak tam zet an thi ti theih a si nan an hmin cazin felfai in an la thei hrih lo. Tuiṭum ih nauhak thi cazin ah an ngankhum hrih lo ih neta ah an phuang ding lai.

An thatmi nauhak pawl cu innsung ih um men, inn kiangkap ih rak lek le lamzawhnak ih tel pawl an si. Kum 6 le thla 3 mi Khin Myo Chit cu ralkap pawl a ṭih tuk ruangah a pai tang sungah ava bawk ih ralkap pawlin an kap that.

Kum 11 mi Aye Myat Thu khal an innkot ih a lek rero laiah a lu ah an kap ih a hmun ah a thi cih. Kum 13 mi Sai Wai Yan cu ralkap pawl ṭih ah a tlan ih a lu dunglam ah an kap ih a thi. Mandalay ramsung ah nauhak thi an tambik, 26 rori nauhak an thi.

Yangon ramsung ah nauhak thi 13 record a si. Kachin State, Momauk khua ih um nauhak kum 13 mi Aung De cu ralkap pawl ṭih ah an inn sungah a relh ih a inn cu bomb in a tlak puak ruangah innsung ah a thi.

Chinram, Tedim khua ih nauhak kum 10 khal bomb puak ruangah a thi ih nauhak kum 6 mi le kum 10 mi in hliam an tuar. Ralkap in thuneihnak an lak hnu Feb.1 ihsin Myanmar ramsung ah mithi 827 zat an um zo tin zingzoitu Assistance Association for Political Prisoners (AAPP) in a tarlang.

Be the first to comment

Leave a Reply

Your email address will not be published.


*