Ralkap In Mandalay PDF 23 Cu An Ralthuam Pawl Thawn Kan Kai An Ti

Thuneihnak latu ralkap in August 21 ah Mandalay PDF 23 cu an meithal, ralthuam pawl thawn kan kai tin thu an phuang. July thla cem zik zawngah Mandalay, Pyin Oo Lwin ramsung ah PDF 2 an rak kai.

An kaihmi 2 in PDF mino pawl cu tlangpar hriamkai pawl hnenah training kai dingin an kuatsuak ṭheu. An kaihmi 2 cu thu an sut vivo ih an zingzoi hnuah midang 23 khal an kai tin ralkap in thu an phuang.

An kaihmi pakhat in Kachin ralkap KIA ramsung ah mino pawl training kai dingin a kuatsuak ṭheu an ti. An kaihmi ṭhenkhat cu Patheingyi ramsung ih palik 2 kahnak ah an telve, cun lamzin ih bomb kamtu khal an si an ti.

An kaihmi pakhat Zaw Noe cu KIA pawlin cozah innpi le mipi tamnak hmun ah bomb puah dingin an fial tin ralkap pawlin thu an suah. Asinan, KIA lamin zianghman thu an suah hrih lo, ralkap pawl ih an thuphuang cu zohman in an zum lo.

Cun, an kaihmi meithal zuk an tarlang ih meithal pakhat lawng an tar, cukhal cu ralkap pawl ih meithal ti a theihtheih, Online mipi pawlin an zum lo tuk ih minung 23 in meithal pakhat hi an hmantawm aw rero ding maw si tin capohnak ah an rak hmansak.

Be the first to comment

Leave a Reply

Your email address will not be published.


*