Ralkap In Mask Bun Lo Ruangah A Lu Ah Veithum A Kap Ih Cerek Mu Tlangin Fala Pakhat Ava Kap Ngah Bet, An Kiangih Um Nunau Khal Lungphucawl In A Thi

Sagaing Division, Chindwin tiva kap ih um Minkin khua sungih thilthleng hi a rapthlak tuk. August 17, 2021 sun ah ralkap upa pakhat cu a duty ih mask bun lo pawl a kawk vivo.

Ralkap in pacang pakhat cu mask a bun lo ruangah a lu ah veithum a kap ih cerek mu tlangin an dunglam ih um fala ih liang ah ava kap ngah bet. Cun, an kiangih um nunau pakhat in meithal awn le mithi ruak, lu puakdarh a hmuh ruangah a ṭih tuk ih lungphucawl in a thi.

Mithi pahnih cu Minkin khuami Zaw Myo Myint le MinSa khuami Mazin Mar Win an si, hliamtuar fala khal siizung ah an tuamhlawm rero lai. Mithmutu pakhat in “Motor Boat Association Office gate kiangah ralkap cu a duty ih mask bun dingin mi a fial. Ṭhaten khal a fial lo, mask nan bun lo asilen nan thi thluh ding tin a hringro.

Zaw Myo Myint thawn an tongaw ih “Ziangah nang kha mask na bun lo?” tin a sut. Malte arak in zo ruangah Zaw Myo Myint in “Kuva ka ei lai sisi, ziangtin mask ka bun thei ding” tin a sawn. Ṭongkam an el’aw ih mual liamtu in “Mask sungah maw kuva ti ka phui ding” a ti.

Ralkap in “Ziangtin maw in biak ih” tin a vuak ciamco hngal, ralkap dang khal an ra thleng cih ih an sit ciamco. Kiangkap um pawlin an rak kham lawk ih “Kutthlak nawn hlah uh, a ri a si kha” an ti. Ralkap in “Khuitawk ih um so na si?” tin a sut ih “Minkin khua ah” a ti. Meithal in a tin ih a sutsal cu “Minkin ah a si lo” a ti sal. Ralkap in “In bum tum maw si” tin a lu ah veithum a kap cih” a ti.

Mikaptu ralkap in mask a bun ve lo nan mipi pawl cu mask bun dingin a hringhro. Tualsung mipi pawlin “Mikaptu ralkap cu kum 20 lenglo ralkap arak ṭuan zo. Kum 20 lenglo ralkap a ṭuan zo ruangah ram hrangih nunnak hlantu tin thih khal a ṭih lo thu a rel ṭheu” an ti.

Zaw Myo Myint cu a hmun ah a thi cih, cerek mu tlangin an dunglam um fala pakhat ih liang ah a kap ngah. Cun, an kiang ih um Mazin Mar Win in hliamhma tuar rapthlak tuk a hmuh ruangah lungphucawl in a thi cih. Zaw Myo Myint in fate 3 anei ih kum 10, kum 9 le kum 3 mi an si.

A nauhak bik kum 3 mi cu a suah ihsin ruhcang damlonak anei, an innsang hi an harsa tuk tin vengsung mipi pawlin an rel. Zaw Myo Myint le Mazin Mar Win an thih thuhla ah ralkap pawlin “Ralkap ih meithal lonsak an tum ruangah an kap that” tin thu an suah, asinan tualsung mipi pawlin “Thudik an thup tum ruangah thudik loin thuthang an suah” an ti.

Be the first to comment

Leave a Reply

Your email address will not be published.


*