Ralkap In Mino 4 An That Ih Motor Accident In An Thi Tin An Phuang

June 22 zingah Mandalay PDF le ralkap pawl an kapaw ciamco, Chanmyatharzi Township ih PDF umhmun khuarnak cu dalan pawl ruangah ralkap in an thei. Ralkap pawlin an va sim tum cu an rak kap ciamco ih kaphnih kahawknak a suak.

Ralkap thuthang Myawaddy TV ah PDF 8 an thi ih 8 an kai, hliamtuar khal tam zet an um tin an phuang. Mandalay lamzinkap ah palik /ralkap pawlin umhmun an khuar vivo ih an rinhlelmi pawl cu an kap ih an kai.

Motor thawn lamzin ih tlanlai mino 4 khal hriamkai ah an ruat ih an dum, lamzinkap ih ban an pah ngah ih mino 4 cu an kai. An motor cu bomb in an puah ih motor accident in an thi thluh tin a zan ah an phuang.

Mino 4 cu hriamkai an si lo ih ar vulhnak hmuan ih feh tum an si. Mino 3 cu Ta’ang miphun an si ih pakhat cu China-Myanmar mi a si. An hmin cu Nai Tun Kyi, Nai Hlaing, Chit Swe le Arsii pawl an si. Mithi Nai Hlaing cu June ni 6 ih nupi nei pekte a si, cun an thatmi Chit Swe cu Ta’ang mino lakih model rak ṭuan rero zo a si.

Ar vulhnak lam pan in an feh lamah meithal awn an thei rero, cutin lamzinkap ah palik thawn an tongaw thutthi ih an kirsal. Palik in ralkap pawl a sim thei ih ralkap motor thawn an dum hngal, meithal in an kap phah vivo ih lamzin kap ih ban an pah ngah.

An motor hmailam a kawr nan motor sungih um mino 4 cu an thi lo ih hliam an tuar, ralkap pawlin mino 4 cu an kai ih hmun dangih an hruai hnuah an thih thu theih a si. Ralkap in an motor cu bomb in an puah ih motor accident ih an thi thluh tin an phuang.

Nai Hlaing ih nupi in “Hriamkai PDF pawl tin an phuang, PDF thawn pehtlaih awknak zianghman an nei lo. Ar vulhnak hmuan ih feh tum an si, motor sungah ziang thilhman an hmu lo. Tuitiang an ruang khal kan ngah thei hrih lo” tin ṭap phah in a rel.

Be the first to comment

Leave a Reply

Your email address will not be published.


*