Ralkap In Mogok Fala An Kai Ngah Lo Ruangah Hringtu A Nulepa An Kai, A Pa Cu An Vuaknak Ah A Ha Thlong

Myanmar ralkap pawlin Mogok, OhnKineYwarThit khua ih um fala Ma Thaw Thaw cu April 26 sun ah kai dingin an inn ah an va feh. Asinan inn ah arak um lo ruangah inn ih um a nulepa le a mo an kai.

Hringtu a pa in “Inntek pabik lawngin ka lo thlun ding” a tiih ralkap pawlin “Ṭong tam aw hlah” tin an zaten an hruai thluh. An innsang pawlin an pehtlaihaw thei nawn lo, thawngtla suak pakhat in ‘Ma Thaw Thaw ih nulepa cu an vua nasa tuk, a pa cu an vuaknak ruangah a ha thlong” a ti.

June 30 ah ralkap in Myanmar rampum huap thawngtla 2000 lenglo an suah zalen, cutawk ah Mogok ih thawngtla 4 khal an rak suah zalen ih Ma Thaw Thaw ih mo khal an suah ve. Asinan, hringtu a nulepa cu an suah zalen lo ih pukmah 505 in thubuai an orhter thu theih a si.

Ma Thaw Thaw cu online sungih milar pakhat a si, a nu thawn capoh video tawi tete an rak tuah ṭheu ruangah hmeltheih khal an nei tam zet. Ma Thaw Thaw in “Kan inn ah in ra kai tum ih ka rak um ruangah innsung ih um zaten an kai thluh.

505 hmin cazin sung khalah ka tello nan in rak kai tum thutthi, lamzawhnak ih ka tel ruangah kaih in tum. Hmeltheih ka nei tam ruangah le thu dangdang ruangah kai in tum ih in kaih ngah lo ruangah ka nulepa cu tawktarh ah an kai.

Ka nulepa cu 505 in thubuai an orhter, ka cangvaihnak ah ka nu cu a tel phahphah. Ka pa cu online tham khal a thiam ngutngat lo. Inn ah aum ringring, mino pawl ih kan cangvaihnak ruangah kum upa lam nulepa pawlin an tuar cu a poi tuk, annih thawn a pehtlaihaw lo. Tu’ah kei cu hmunhimnak ah ka um zo’ a ti.

Be the first to comment

Leave a Reply

Your email address will not be published.


*