Ralkap In Pitar A Pawngsual Thuhla Ah Ralkap Pawlin Thu An Suah

Shan State, Kutkai Township, Namphalon khua ah pitar kum 62 mi cu ralkap pakhat in a pawngsual. November 7, 2021 sun ah nunau pahnih cu an hmuan sungah an um. Pakhat sawn cu vok rawl la dingin hmun dangah a feh, cumi sungah an kiangkap ih um ralkap Min Min Soe in rawlhmeh ava dil hnuah a pawngsual.

Hmin tarlang rem tilo tualsung mi pakhat in “An hotu ralbawi thawn kan tongaw ih ngaithiam in dil. Ralbawi in ziangkim a tifel ding thu in rak sim ih daiten um uh in ti. Thubuai cu tidai a tum, daiten um thuhla siloin mi pawngsualtu hi hremnak pe hai seh ti kan duh. Khawtlang misepi hmaiah ngaithiam in dil thei lo asilen nunau hrangah a him nawn lo ih thlaphang in an um ding” a ti.

Ralkap pawlin mi pawngsualtu cu thuhhlo an tum ih ralram ah an kuat ding thu pawl an rak sim, an thuhla cu online sungah a darh ciamco hngal. November 11 ah ralkap pawlin “Battalion 336th ih ralkap ṭuanlai Min Min Soe in nunau kum 62 mi a pawngsual ngai ti tetti ihsin theih a si.

November 7 sun nazi 2:00 hrawngah ralkap pathum Kyaw Min Wai, Moe Win le Min Min Soe pawl cu tidai in ding an va khai. An tidai khainak kiang hmuan sungih um nunau pakhat cu ralkap Min Min Soe in a duh lo nacingin a pawngsual thuhla cu kan zingzoi hnuah kan thei” tin ca an suah. Ziangvek hremnak an pe ding ti cu an tarlang lo.

Kan dung June 10, 2021 khalah Kutkai Township, Namphatka khua ih metila (phungyi) nunau kum 14 mi cu ralkap in arak pawngsual nan tuini tiang an thubuai hi an tifel hrih lo ih ralkap lamin ziang thuhla hman an suah hrih lo.

Be the first to comment

Leave a Reply

Your email address will not be published.


*