Ralkap In Raltlan Pawl Ei Le In, Siivai An Urkang Sak Ruangah MPDF In “Mipa Diktak In Doaw Kung” An Ti

Doawknak tualrawn ah hriamhrei keng lo khuasung mipi pawl siatsuah le that thiang a si lo, nunau pawngsual khal an duhlobik mi a si ih dau neihlonak a si an ti.

June 7, 2021 ah Shan ramsung ah mipi kilhimtu Mobye People Defense Force (MPDF) le ralkap pawl an doaw ciamco, zingpit ihsin an kapaw ih zanlam nazi 5:00 hrawng tiang an kapaw.

Mipi lam cu Lai meithal le tuahcop meithal lawng an hmang nan ralkap in an neh thei cuang lo, ralkap pawl cu sniper le pukpi an hmang ih catbang loin meithal an kap ciamco.

Zanlam ah MPDF pawl cu dung an sip, an kahawknak ah mipi lam 3 in hliam an tuar. Ralkap lamah mithi le hliamtuar an um nan ziangzat an um ti cu an rel thei hrih lo. An ramsung ah ralkap pawlin umhmun an va khuar vivo ih raltlan pawl umnak lam khalah an feh, raltlan pawl cu an rak tlan thluh man.

Asinan, an thilri bungrua pawl cu an tanta, ralkap in raltlan pawl ih thilri bungrua cu an urkang sak thluh. An ei le in, siivai le motor pakhat an urkang sak ih a zaten kom in ting 50 man hrawng a si. Curuangah MPDF in “Leitlun huap doawknak ih daan le dun pawl upat in huaisen zet, mipa diktak in doaw kung” tin theihternak capi an suah.

Be the first to comment

Leave a Reply

Your email address will not be published.


*