Ralkap In RC Puithiam An Tin “Vaksuak Nawn Hlah, Na Thihnak Dingah Cerek Mu Pakhat Lawng A Ṭul” Tin An Hringhro

Shan State, Nyaungshwe ramsung ih khuatlawng RC puithiam cu ralkap pawlin mipi kilhimtu hnenah thilri bungrua pawl na va pe tin an mawhpuh ih meithal thawn an tin hnuah “Na thihnak dingah cerek mu pakhat lawng a ṭul” tin an hringhro thu a khualtlawngpi pakhat in media hnenah a sim thei.

October 30 sun nazi 3:00 hrawngah Nyaungshwe khua ihsin Phekon lamah motor an mawng ih lamzin ah ralkap 8 in an rak dingter. Motor sungah RC puithiam le minung 5 an to. RC puithiam thluntu pakhat in “Ralkap pawlin motor an dingter hnuah thilri bungrua pawl in thlakter thluh.

Ralkap pawlin na pinpin thilri bungrua pawl cu an thlak ciamco. An zohdik thluh, RC puithiam khal an zohdik ih thu an sut. RC puithiam cu mipi kilhimtu hrangah sumpai na hawl ih PDF hnenah meithal le siivai pawl na va pe. Misual lamah na tang tin an hringhro ciamco” a ti. “Vaksuak nawn hlah, kan lo kah thatnak dingah meithal cerek mu pakhat lawng a ṭul” tin meithal thawn an tin.

Kum 46 mi RC puithiam cu niling lakah khuk an bilter ih “Na ka cip’aw” tin a bek ah meithal in an tin ringring. RC tlawnginn ih an ciin mi hanghnah hnangrah hrang putatsii dip 4 an phurmi khal an laksak ih bomb kamnak dingah nan lei tin sual an puh. Ralkap pawlin RC puithiam cu na vaksuak sal asilen kan lo kap that ding tin an hringhro.

Be the first to comment

Leave a Reply

Your email address will not be published.


*