Ralkap In Thuneihnak An Lak Ruangah Pumcawmnak An Nei Nawn Lo, An Harsat Thu A Rel

Shan State, Nyaungshwe Township, Inle Lake tili parih um pacang kum 24 mi Ko Win Moe Kyaw in ralkap pawlin ramsung thuneihnak an lak ruangah an harsat thu cu media hnenah a sim thei.

Inle tili parih um Sitha khua ah an um, lawng mawng ih eilein hawl ṭheu arak si. Ralkap in ramsung thuneihnak an lak ruangah le Covid-19 natsia ruangah miphur ding khualtlawng khal an um nawn lo a ti.

Ko Win Moe Kyaw in “Miphur ding khualtlawng an um nawn lo ruangah hnaṭuan ding aum nawn lo. Cumi lakah Covid-19 thlisia a hrang bet fawn, nga hawlin eilein ka hawlsal nan kan sinpi cuang lo. A zuarnak ding aum nawn lo” a ti.

A nupi Mazin Mar Win thawn fapa kum 2 mi an nei, a nupi cu hnipuan ṭhi in hna a ṭuan ṭheu nan ralkap in thuneihnak an lak hnu ihsin a ṭuan thei nawn lo ih inn lamah aum men.

Ko Win Moe Kyaw cu pangpar le hanghnah hangrah pawl phur in kiangkap khualakah ava zuar nan bomb puak, kap thataw tipawl a thleng ṭheu ruangah a vaksuak ngam nawn lo. Ko Win Moe Kyaw in “Pangpar zuar in ka vaksuak ngam nawn lo, meithal awn le bomb puak awn ka thei ringring.

Ka mithmuh rori khalah mi an kap that lai ka hmu, bungbel tum ruang khalah mi an kap that. Innsang nei ka nei ih ka vaksuak ngam nawn lo” a ti. Harsa zetin an innte ah an um ih rampi a ṭhasal ding caan hngakin caan an hmang rero lai.

Be the first to comment

Leave a Reply

Your email address will not be published.


*