Ralkap In “Uico Ralkap Tin In Kosal Asilen Nan Khua Inn Zaten Kan Urkang Thluh Ding” Tin An Hringhro

Mandalay Region, Kyaukpadaung Township, Latpan Kyin khua ah inn 100 hrawng an um ih an khualal cu ralkap lamtang a si.

An khuasung ah lamzawhnak an nei ih “Uico ralkap pawl kan duh lo, kan ngaithiam dah lo ding. Kan cohlang dah lo ding” tin an au ciamco, cumi hnuah an khualal thawn an buai ih an khualal inn cu lungto in an deng ciamco.

An khualal in ralkap hnenah zual a ko ih an khua ah ralkap pawl an va lut, khuasung an lut veten tlunlam ah meithal an kap ciamco. Lamzawhnak ih tel pawl cu sahimnak hawlin hmun dangah an tlan, ralkap pawl cu an khualal inn ah zanhnih an riak ih mipi hruaitu upa pawl thawn remnak an tuah ih hmin an khenter.

“An khuasung ah lamzawhnak nei nawn lo ding, uico ralkap pawl tin au nawn lo ding” tin hmin an khenter. Uico ralkap pawl tin an ausal asilen an khua inn zaten an urkang ding tin an hringhro.

Khuasung mi pakhat in “Kan khualal thawn kan rak buai zo ih lungto in kan deng ciamco, khualal in phuba lak a duh ruangah ralkap pawl a ko. Ralkap pawlin khualal kan tuahmawh ding an phang ruangah remnak in tuahter ih uico ralkap pawl tin kan ausal asilen nan inn zaten kan urkang ding tin in hringhro” a ti.

Be the first to comment

Leave a Reply

Your email address will not be published.


*