Ralkap Kuthnuai Ih Tlawngkai Pawl Cu Thla 2 Sung Lawng Tlawng An Kai Hnuah Buaih An Pe

Ralkap kuthnuai ih tlawngkai pawl cu awlsam zetin buaih an ngah hluahhlo, thiamnak lam aiin capi an ngaina sawn. Kachin ramkulh, Putao khua, Government Industrial Science Institute (GTI-Putao) ih tlawngkai pawl cu thla 2 sung lawng tlawng an kai hnuah Engineer buaih an pe.

Kum thumnak tlawngta pawl cu an thiam le thiam lo khalah tlawng an kai phot cun buaih an ngah. Hmin tarlang rem tilo pakhat in “December thla ihsin tlawng an kai thok ṭheu, February thla ah ralkap in thuneihnak an lak ruangah tlawng an cawl.

June thla ah CDM tuah lo saya/sayama pawl thawn tlawng an ongsal, tlawng khal ṭhaten an kai lo, July thla ah exam an tuahter cih. An zirmi ah an thiam le thiam lo khal thil zianghman an tuahter lo ih buaih an pe” a ti.

GTI-Putao tlawng ah kum thumnak tlawngta 100 hrawng an um ih ralkap in thuneihnak an lak hnuah ralkap thulung in tlawngkai cu an malte. CDM tuah saya/sayama khal mi 26 an um.

Tualsung mi pakhat in “Thiamthil nei loin buaih an ngah, a takram ih hna an ṭuan tikah buainak an tong ding ti cu theihcia a si. Ziangvek thinlung in fimthiamnak an kaihruai tum ti khal ka thei lo” a ti.

Be the first to comment

Leave a Reply

Your email address will not be published.


*