Ralkap Lamtang Pawl Cu Lai Meithal Thawn Mipi Lamah An Lut

Magway Division, Htee Lin Township, Zee Taw khua ih ralkap lamtang Pyu Saw Htee pawl cu an sual siraw in YDF-Htee Lin lamah an lut. Lai meithal zun 25 khal mipi kilhimtu hnenah an ap ih nanmah thawn ral kan dotlang ding an ti.

YDF-Htee Lin thuphuangtu in “Pyu Saw Htee miphum 30 cu kan hnenah an ra tlanlut, ziangti vekin Pyu Saw Htee pawlkom hi an din ti cu ka thei lo. Kan hnenih ra luttu Pyu Saw Htee pawl cu Zee Taw khuami an si, an meithal pawl an thlah ih nangmah thawn hnaṭuan tlang dingin kan ra ap’aw an ti” tin media hnenah a sim thei.

October 14 zinglam nazi 8:30 hrawngah ralkap kuthnuai ih cangvai ṭheu Zee Taw khua ih Pyu Saw Htee pawlin Lai meithal 24 le Htein Taing khua ihsin Lai meithal 1, zaten kom 25 cu mipi kilhimtu YDF-Htee Lin hnenah an ap.

Cun, mipi lamah tangin thuneihnak latu ralkap pawl an do thlang ding thu tiamkam awknak an nei. October 10 sun ah Htee Lin ralkap sakhan ihsin meithal phur Pyu Saw Htee pawl cu lamzin ah YDF-Htee Lin pawlin an rak kap ciamco ih Pyu Saw Htee pakhat a thi.

An meithal phurmi 20 khal an laksak, Pyu Saw Htee pawl cu that an tong rero nan ralkap pawlin an run lo, an humhim tum lo ruangah an beidong ih mipi lamah an tlanlut. Pyu Saw Htee pawl ih meithal cu ralkap in mipi kilhimtu ta an rak lonsakmi pawl a si.

YDF-Htee thuphuangtu in “October 10 sun ah Pyu Saw Htee pawl an fehnak lamzin cu kan thei thup ih kan va kap. Pyu Saw Htee pawl kan kap cu ralkap pawl kap vek thotho kan si, ralkap pawlin an thuhla an thei nan an run lo, an ra humhim tum lo.

An khua khalah ralkap pawl an va feh lo ih an ngaihsak lo, ralkap pawlin an phatsan vek a si. Curuangah ralkap pawl an zum thei nawn lo ih kan hnenah an ra tlanlut” a ti. Htee Lin ramsung ah mipi kilhimtu le ralkap pawl an doaw ṭheu ih ralkap pawlin an neh dah lo, October 7 sun ih an doawknak khalah ralbawi pakhat telin ralkap 4 in hliamhma nazet an tuar ih dung an sip.

Be the first to comment

Leave a Reply

Your email address will not be published.


*