Ralkap Motor 30 Lenglo Cu Chinram Ah An Kaiso

Tuizing October 11 zing ah Kalaymyo ihsin ralkap motor 30 lenglo cu Chinram ah an kaiso tin mithmutu pawlin an rel. Tualsung mi pakhat in “Tuizing nazi 7:30 hrawngah ralkap motor 40 hrawng cu Chinram ah an kaiso. October 8 ah Kalaymyo RTC sungih thleng ralkap motor pawl an si” a ti.

October 8 sun ah Gangaw lam ihsin tank 2 le ralkap motor 40 lenglo cu Kalaymyo sungah an lut ih RTC ah umhmun an khuar lawk. “Ralkap thazang le an ralthuam pawl an cakter tum a si ding. October 9 sun ah tank 2 le ralkap motor 15 cu Chinram ah an rak kaiso zo, Tedim lamah an feh ih October 10 sun ah Tedim ihsin Falam lamah an fehsal.

Tuisun ah ralkap motor dang an poksuak sal, tuisun ih ralkap motor sungah cun ralkap le ralthuam pawl aum” a ti. Chinram ah mipi ralkap thazang a ṭha zet ih khawte lam cu mipi kut ah a tam sawn aum zo. Lungler, Ikuino le Vaungtu ralkap sakhan pawl lak a si ih Surkhua palik sakhan khal ur a rak si.

Tu ah Tibual sakhan cu suak thei loih kulh a sinak a rei zo. Curuangah SAC hotupawlin North-East Commander Brig. Phyo Thant cu an kai ih thawng an thlak. Tu hi a aiawh Maj. Gen. Than Hlaing ṭuanvo an lakter. Anih hi Tongoo mi a si ih a suahpi, a nau rori khal mipi lam hotu a si ruangah an kai ih rawng takih thattu a si.

Sagaing le Chin ramsung ih ralkap pawl hotu hi an thleng zo ruangah an cangvaih tumdan khal a danglam zet a si ding ti an zum.

Kalaymyo tualsung mi pakhat in “Mizan khalah Kalaymyo airport ah vanzam te pakhat a ṭum, ziang an phur ih an thiar ti cu kan thei lo. Airport ah motor lut/suak cu a tam zet, thilri bungrua pawl an thiar rero. Kalay University khalah ralkap pawl umhmun an khuar, mipi cu kan thlaphang zet” a ti.

Be the first to comment

Leave a Reply

Your email address will not be published.


*