Ralkap Motor 30 Lenglo Ramthlo Khua An Thleng

Chinram, Falam peng sung Tlangzar khua sungah ralkap motor 30 lenglo an va lut, October 19 simlam nazi 4:00 hrawngah Tlangzar khua ah an lut ih peng 2 hlatnak ih um Ramthlo khua cu pukpi in veithum an kap.

Ramthlo khuaimi in “Simlam nazi 4:20 ah ralkap motor cu Tlangzar khua ah an lut rero, khua ihsin ralkap motor 30 tiang cu kan hmu thei. Cu ai khalin an tam thei, pukpi in kan khua hi veithum an rung kap. Meithal awn cu vei tampi kan thei, Tlangzar khua mipi zaten an tlan thluh” a ti.

Hlaral ihsin Ramthlo khua cu an kah hnuah an va lut ih Baptist Biakinn le AG Biakinn sungah umhmun an khuar. Biakinn sungah ziangtin an khuasa ding ti cu theih a si hrih lo, ralkap pawlin an umhmun khuarnak hmun cu zu le sa hmun ah an hmang vivo.

October 11 ah Kalaymyo ihsin ralkap motor 60 le tank 2 cu Chin ram ah an kaiso ih lamzin ah mi an that phah, khuasung inn le lo khal an siatsuah. Falam ihsin Hakha lam feh an tum ih lamlak ah Chin mipi kilhimtu pawlin an rak kah ruangah an motor 16 cu a siat zo. Hakha lam feh an tum thotho ih Ramthlo khua an thleng zo.

Be the first to comment

Leave a Reply

Your email address will not be published.


*