Ralkap Motor 9 An Kap Siat Hnuah Falam Lam Ih Kirsal Tum Ralkap Pawl Cu Chin Mipi Kilhimtu Pawlin An Rak Kap

October 13 zing ah ralkap motor 60 le tank pawl cu Hakha lamah an feh tum, Falam-Hakha lamzin ah Chin mipi kilhimtu pawlin an rak hrentang ih hmailam pan thei lo leh dunglam kirsal thei loin an tuah. Tu’khalah an tang ringring lai ih Chin mipi kilhimtu pawlin an kap phahphah.

CNF Thuphuangtu Salai Htet Ni in “Hakha lam ih umhmun khuar tum ralkap motor 9 cu kan rak kap siat thei. Cumi hnu sun nazi 1:00 hrawngah Falam lam ih kirsal tum ralkap pawl cu kan rak kap ih ralkap 7 hrawng an thi. Kannih lam ahcun rak bawh ih kap kan a si ruangah hliamtuar le mithi kan um lo” tin Irrawaddy thuthang hnenah a sim thei.

October 14 khalah ralkap motor 7 an rak kap siat ih zate kom cun ralkap motor 16 an siatsuah zo. Kan dungte ah Falam-Hakha lamzin ih tang ralkap pawl va bawm dingin Hakha ihsin ralkap pawl an poksuak ih Hakha khua suah zawngah CNA le CDF in an rak kap ciamco ruangah Hakha ah an kirsal.

Salai Htet Ni in “Mipi thlacamnak hmual. A caan asilo nain Pathian in kan Chinram ah ruahpi a surter, mero a zamter ih kan ral pawl cu ruahpi le khuasik in a nuai ciamco. Mero ruangah ral pawlin in hmu thei lo, cutik laiah Pathian in kan meithal le cerek mu pawl A hmang ih kan ral pawl kan neh. Pathian hnenah lungawithu in rak simpi cio uhlaw”

Be the first to comment

Leave a Reply

Your email address will not be published.


*