Ralkap Pawl Cu PDF Vekin Lem An Cang Ih PDF Sakhan Pakhat An La

Min Aung Hlaing naule pawl cu mipi kilhimtu vekin lem an cang ih Sagaing, Wetlet Township, Htone Bo khua kiangih um tualsung PDF sakhan an la. November 13, 2021 simlam nazi 6:00 luan hnuah PDF sakhan cu an la ih an urkang.

Thit Sein khua ih umhmun khuar ralkap 50 hrawng cu ralkap uniform an hruh lo, Lai meithal an keng hrim ih bike 21 thawn PDF sakhan lamah an va feh. PDF sakhan ih ṭuanvo neitu in “An zaten khuasung mi vekin hnipuan an hruh thluh, ralkap uniform an hruh lo. Sakhan kiang an thleng zawngah pukpi thawn in kap hmaisa, cumi hnuah meithal phunkim in in kap ciamco” a ti.

PDF sakhan umnak cu mi ṭhenkhat in an rak sim thup ruangah awlsamten an thei, PDF sakhan kiangkap ih bomb an kamnak hmun pawl khal an rak thei thluh ruangah PDF sakhan cu an herkual ih dunglam ihsin an lut. PDF sakhan cu an kap thutthi ruangah PDF pakhat le khuasung mi pakhat an thi ih sakhan cu an suahsan.

PDF sakhan cu an urkang ih sakhan ih um bike khal an ti siat, PDF sakhan an lak thei ruangah ralkap pawl cu zu le sa thawn lawmnak puai an tuah tin kiangkap um pawlin an rel. Sakhan ah PDF paziat an um tilen le hliamtuar umzat cu security hrangah a cipciar in an phuang lo nan ṭuanvo neitu in an zaten hmunhimnak ah an thleng thluh zo a ti.

Ralkap pawlin PDF sakhan an lak hnuah kiangkap khua pawl cu ralthuampi in vei 30 hrawng an kap ciamco. Kan dung October thla sung khalah ralkap pawl cu damlo pawl phurnak ambulances in mipi kilhimtu sakhan ah an va lut ih mipi kilhimtu pawl an kap. Cutawk ih an doawknak ah mipi kilhimtu 2 an thi ih pakhat an kai.

Min Aung Hlaing in Myanmar ramsung thuneihnak a lak hnuah mipi cu daiten lamzawh duhphorhnak an nei ih ralkap pawlin zangfahnak nei loin an kap that ciamco. Mipi pawl khalin an tuar thei nawn lo ruangah meithal kengin an do lawlaw, tulai hi an doaw nasa zet ih ralkap pawl khal ralthuam kimcang in mipi kilhimtu pawl an kap.

Yangon, Mandalay le Bago khua sung khalah kahawknak a thleng rero. Kum reipi sung kahawknak thuhla an rak theihlonak Sagaing ramsung ah nasa zetin an doaw ih tulai Myanmar ramsung buainak ah an doawknak tualrawn pakhat ah a cang.

Be the first to comment

Leave a Reply

Your email address will not be published.


*