Ralkap Pawl Lak Khalah Rinhlel Awknak A Tam, An Ṭongkam Khal An Fimkhur Zet

Min Aung Hlaing in Myanmar ramsung thuneihnak a lak ruangah ralkap/palik tam zet cu a kuthnuai ah hna an ṭuan duh nawn lo ih CDM tuah in hmun dangah an tlan rero zo. Hmin tarlang rem lo Yangon ralbawi pension zo in “Tulai hi ralkap sung khalah buainak phunphun a thleng, pakhat le pakhat khal an rinaw thei nawn lo” a ti.

Sakhan ihsin CDM tuah an um asilen tlunlam upa pawlin sakhan hotu cu an rinhlel ih ṭhaten an pehtlaih nawn lo. An sinak khal a thlakniam sak ṭheu, ralbawi pawlin an kuthnuai ralkap pawl cu an rin thei nawn lo, asinan hringhronak nasa zet cu an pe ngam lo.

Ralkap pawl lakah duhduh in ṭongkam an hmang ngam nawn lo, an ṭongkam hmang mi hi an fimkhur zet ih zohthuptu an um ringring ti an theiaw. Ralkap innsang pawl cu lenglam suah an siang lonak hi a rei tuk zo ruangah lenglam suah an siang lonak cu hringhronak ciikhat ah an ruat’aw.

Sakhan sungah phone khal an bia ṭhiṭha ngam nawn lo, inn an tlun tik lawngah phone an bia ṭheu. An kiangkap ah mi pakhat khat an um asilen zo a si ti an theifiang lo cun phone an bia ngam lo, rinhlel awknak a suak pang ding ti an phang. Cun ralkap/palik pawl cu an duty cawlh caan ah uniform hruh in mipi lakah an vaksuak ngam nawn lo, anmahten mipi lakih an vaksuak ding asilen an uniform cu an thleng ṭheu.

An innsang pawl khal ṭul poimawh tuk lo ahcun innleng an suak ngam nawn lo, an vaksuak ding asikhallen anmahten an vaksuak ngam nawn lo ih mi pakhat khat an hruaitel. Ralkap/palik pawl ih nun cu a thlamuan nawn lo tin ralbawi cawlh la zo in a rel.

Be the first to comment

Leave a Reply

Your email address will not be published.


*