Ralkap Pawlin A Nu An Kai, A Pa Taksa Zeng Cawmtu Rawlthar Kum 15 Mi Cu Bomb Puak Ruangah A Thi

Sagaing ramkulh, Monywa khua ih um rawlthar kum 15 mi Ko Shwe Lone cu Sipin (hnawmhlonnak ah) hnaṭuan in hringtu a pa taksa zeng le a naule pawl a cawm.

October 4 ah hringtu a nu cu ralkap pawl an kai ih sumpai laklutnak an nei nawn lo, a hlanah Sinpi ah hna arak ṭuan nan a suak. An innsang an harsa tuk ih a nu len ralkap pawlin an kai, curuangah nica hlawh in Sipin ah hna ava ṭuansal.

Nikhat ah Ks. 5000 hlawh in hna a ṭuan ih a pa taksa zeng le a naule pawl a cawm, an hnaṭuannak kiangah zo ti theih loin bomb an rak kam thup. October 14 zinglam nazi 7:00 hrawngah hna an va ṭuan, hnawmhne an sam ih motor parah an ret, cutin hnawmhne an sam laiah bomb kammi a puak thutthi ruangah a hmun ah a thi cih.

Hnaṭuantu minung 4 an si ih pakhat cu a kut a bul, pahnih khal hliamhma nazet an tuar ih siizung lamah an phur. Ko Shwe Lone ih ruak cu zanlam nazi 4:00 ah an vuiliam, hringtu a pa le a naule pawl cu cawmtu an nei nawn lo ruangah an thinhar zet.

Zoin bomb an kam ti cu theih a si lo, tualsung mi pakhat in “Ralkap pawl ih an kammi bomb a si ding ti ka zum. Ziangruangah tilen Monywa khuasung ah lamzawhnak an nei ṭheu, cumi lamzawhtu pawl an hringhronak ah bomb an rak kam a si ding” a ti.

Be the first to comment

Leave a Reply

Your email address will not be published.


*