Ralkap Pawlin An Sang Mi Israel Thlingthlatu Hlun In A Hlawh Man Sumpai A Ngah Lo Ruangah A Ban

Myanmar ralkap pawlin thuneihnak an lak hnu reilote ah Israel thlingthlatu hlun Air Ben-Menashe cu dollar $2 million lenglo in an sang. Myanmar ralkap cozah cu leitlun ramdang pawlin an cohlang theinak dingah hnaṭuantu ding a si.

Leiltun ramdang pawl hmaiah ralkap cozah an ṭhahzia pholangtu ding a si. Asinan, a hlawh man a ngah lo ruangah a hna ihsin a ban thu a phuang. Ari Ben-Menashe cu 1951 kum ah Iran ram ah a piang ih Israel thlingthlatu hlun khal a si, tu’ah Canada ramah um in Dickens & Madson Canada ah hna a ṭuan.

American cozah in an ramsung ih um Myanmar ralbawi pawl ih sumdawngnak a phitsak thluh ruangah Ari Ben-Menashe ih hlawh man cu an pe thei lo.

Ari Ben-Menashe in “America ih um Myanmar ralbawi pawl thawn kan pehtlaih awknak cu a ṭha zet lai, asinan American in an sumdawngnak a phitsak thluh ruangah hlawh man in pe thei lo ih hnaṭuannak ihsin ka ban. Sumpai ka ngah lo cu thil thupi tuk a si” a ti.

Myanmar ralkap in thuneihnak an lak hnuah CNN thuthang latu Clarissa Ward cu Myanmar ramsung ih thuthang la dingin arak sawm ih a hlawhtling, asinan Clarissa Ward cu tanhmun nei loin thuthang diktak vek ih a lak ruangah Myanmar ralkap pawl an hmin a siat phah sawn.

Ari Ben-Menashe in 1989 kum ah Iran ramah raldonak vanzam 3 zuar dingin arak tawlrel ruangah American in thubuai an orhter ih kum 1 sung thawng an thlak. Ari Ben-Menashe cu hminsiatnak neicia Israel thlingthlatu hlun a si.

Be the first to comment

Leave a Reply

Your email address will not be published.


*