Ralkap Pawlin Meithal An Kap Ciamco Ruangah Chinnu A Thi

Ralkap pawlin Chinram, Kanpetlet khua sungah meithal an kap ciamco ih kum 52 mi in a ṭih tuk ruangah lungphucawl in a thi. August 6, 2021 zan nazi 9:00 ihsin 11:00 hrawng tiang cu meithal an kap ciamco, bomb le pukpi khal an kap.

Pukpi vei 30 hrawng an kap ih meithal cu vei 1000 lenglo an kap puak. Biakinn le khuasung inn pawl khal an kap siat, ṭhenkhat mipi in an ṭih tuk ruangah hmun dangah an tlan.

Mipi kilhimtu CDF pawl thawn an kapaw si ding ti an zum lawk nan CDF pawl thawn an kapaw lo, mipi in in ṭih hai seh ti an duh ruangah meithal an kap ti an thei.

Khuasung minung an kap ngah le ngah lo thuhla cu theih a si hrih lo nan nunau kum 52 mi in a ṭih tuk ruangah a thih phah, a ruak cu August 7 zinglam ah an vuiliam.

Himi thuhla ah CDF ṭuanvo neitu in “Kanmah CDF thawn kan kapaw lo, anmah le mah an kapaw si ding tin kan rak ruat” a ti. August 7 zinglam ah ralkap pawl cu inn dangdang ah an lut ih zingzoinak an nei vivo, cun lamzin ih vaksuak pawl khal an phone an check sak, ṭhenkhat phone cu an lonsak.

Be the first to comment

Leave a Reply

Your email address will not be published.


*