Ralkap Ruak 7 Zuktu Tin Mibawmtu Cu An Vuak Ciamco Hnuah An Kai

October 20, 2021 sun ah ralkap le Karen mipi kilhimtu KNLA pawl an doaw ciamco ih ralkap lam 7 an thi, hliamtuar khal tam zet an um. Ralbawi General Than Win Tun khal an kap that, ralkap pawlin an rualpi ruak 7 cu hnawmhne funnak in an tuam hnuah thlanmual ah an va hlon.

Ralkap ruak pawl cu mi ṭhenkhat in an rak zuk thup ih online tualrawn parah an tarlang cu a lar ciamco. Curuangah tualsung ih um mibawmtu U Kyaw Win cu ralkap ruak pawl zuktu tin an vuak ciamco hnuah an kai, ralkap ruak pawl zuktu asilo tin kiangkap um pawlin an rel.

Kan dungah Kalaymyo khuasung ih ralkap tank 2 le ralkap motor 40 lenglo zuktu tin an rinhlelmi pathum khal an rak kai zo. Ralkap ruak 7 zuktu tin an kaihmi cu thusutnak hmun ah aum lai, cumi hnuah thawnginn lamah an kuat tum.

An sungkhat in “October 22 sun ah an ra kai, thlanmual thuneitu U Myint Thein thawn an kai. Asinan thlanmual thuneitu U Myint Thein cu an suahsal. U Kyaw Win cu sakhan ah aum lai ih, arei hlanah thawnginn ah an kuat ding ka zum” a ti.

U Myint Thein cu tualsung mibawmtu pawlkom ih tel a si ih Dengue fever le Covid-19 vanglai khalah ralkap sakhan sung le vengsung ah siivai kaptu a si. Mibawmtu pakhat cu thudik loin an kai ih an hrem, a suah lohli theinak dingah thlacamnak in rak bawm cio uh tin an tarlang.

Be the first to comment

Leave a Reply

Your email address will not be published.


*