Raltlan Beunak Ah Ekinn An Lai Ih Hlanlai Ro Thilri An Hmu

Rakhine State, Ann Township, Padon Refugee Camp No. 1 ah ekinn an lai ih hlanlai ro thilri an hmu. August 15, 2021 sun ah ekinn ding lei an lai, cutawk ah coins 24 an sar, coin pawl cu palang sungah an rak um ih a parah ONE RUPEE INDIA tin a nganaw.

Tulai India ramsung ih an hmanmi Coin a si lo, 1862-1919 kum ih an rak hmanmi coin (sumpai) a si ti an thei. Padon Refugee Camp No. 1 hotu in a kol ih a ṭuldan izir in tlunlam ah a hlan tum.

Thayat Pin Kwat khua khalah ekinn ding lei an lai ih hlanlai ro thilri tam zet an hmu, U San Win le Daw War War Win tei nupa in an hmuanchar ah ekinn an lai ih thirkuang an lai ngah thutthi. Thirkuang sungah cun Silver Coin 925 zat arak um.

An khuatlang hruaitu le cozah lam mithiam pawlin an va zohdik ih 1884 kum le 1920 kum ih an sersuah mi ti an thei. Cozah dan vekin an thil sarmi pawl cu kum 100 hrawng lawng ih upa an si ruangah a neitu hnenah an pasal ih an duh dandan in an tuah thei.

Cozah dan ah mi pakhat in khua hlanlai ro thilri a sar ih kum 1,000 lenglo ih upa asilen zohdiknak an nei dingih an sarmi thilri izir in cozah in a laksak thei. Cozah in an lei thei ih laksawng khal an pe ding.

Tuiṭum ih an sarmi pawl cu kum 100 lenglo fang lawngih upa an si ruangah a neitu hnenah an pe kirsal thluh. U San Win le Daw War War Win tei nupa cu an lungawi zet, khuatlang le cozah theihpinak in hlanlai ro thilri an nei ih an duh asilen an zuar thei.

Be the first to comment

Leave a Reply

Your email address will not be published.


*