Raltlan Pawl Cu Rul In An Cuk, Ramlak Ah An Talbuai

Sagaing peng, Kanbalu Township, Koetaungboet khua kiangkap ah tualsung mipi ralkap le ralhrang pawl an doaw ciamco ruangah khua (12) cu mipi in an suahsan, an khua kiangkap ah raltlan 20,000 lenglo an um.

An khuasung ah ralhrang pawlin umhmun an khuar ih an rannung pawl an eisak, ralhrang pawlin ṭhenkhat an kaihmi khuasung mi cu an hrem ciamco hnuah an that, ṭhenkhat cu an pawngsual hnuah an urkang.

Raltlan pawl cu ramlak ah a rem dandan in an khuasa, ramlak ah ruahpi in a nuai ciamco ih mikeu le fikfa lakah hringnun an hmang rero lai. Cutin, ramlak ih an um laiah rul tur nei pawlin raltlan mi (5) an cuk zo, CDM tuah siibawi pawlin rul tur siivai thawn an tuamhlawm ruangah rul cuknak ruangah thi cu an um hrih lo.

Asinan, tu’ah rul tur khamnak siivai cu an nei nawn lo ih rul cuk tong an umsal asilen tuamhlawmnak ding siivai aum nawn lo. Raltlan pakhat in, “Siivai man cu 80,000 a si zo ruangah kan lei thei nawn lo, lei duh khalsehla lei ding a har tuk zo. Rul tur khamnak siivai leinak dingah bawmnak kan ṭul tuk, ralhrang ṭih ah kan tlan ih tu’ah rul ruangah buainak kan tong bet” a ti.

Be the first to comment

Leave a Reply

Your email address will not be published.


*