Ramlak Ih Um Htar Htet Htet Ih Pa A Thi, “Ka Pa, Ziangah Ka Ra Tlung Ding Hngak Loin In Rak Fehsan…”

Myanmar Beauty Queen ngahtu, milar hminthang Htar Htet Htet cu ralkap cozah duh loin a cangvai ṭheu ruangah ralkap in kaih an tum. Cutin, ramri hmunhimnak ah a tlan ih raldodan a zir, amah ruangah an umnak sakhan khal a lar phah zet ih mino tam zet an va tlanlut ve.

Ram le miphun hrangih a zuam rero laiah hringtu a pa in July 26, 2021 ah a thihsan. Htar Htet Htet in “Ka pa in ka tlung ding caan hngak loin in rak fehsan, ka ziangkim a si mi ka pa thawn kan pehtlaih awklonak hi thla 4 a kim zo.

Ka pa thawn kan biakawk lonak hi thla 4 a si, ka pai hmel ka hmuhlonak hi thla 4 a kim zo. Ka pa a dam ṭha maw? An sinpi maw ti cu midang fehtlang in ka rak sut ṭheu. Ni 2 liamzo ahkhan a pum nat ruangah a damlo ti ka thei, ka seherh tuk ruangah pian tawk pian ah tin amah rori ka phone ding ka ti.

Na fanu umnak ah meisa aum lo ih internet khal aum lo, zanlam ah internet umnak hmun ah ka va feh ih hahdamten video call in kan biaaw ding ti ka rak ruat nan. Ziangruangah tuini kherkher ah, khuanu in na fanu parih a laireldan hi a sual tuk.

Ka ra tlung tikah damcak zet le nuam zetin caan kan hmangtlang ding na ti kha, ziangruangah ka ra tlung ding caan hngak loin in rak fehsan. Ka lo ngai tuk ruangah ka lo phone, ka lo biak duh ruangah le na mithmai ka hmuh duh ruangah sokhaw ka lo phone.

Ziangruangah hitin in fehsan, na caan netabik khalah na fanu in ka lo hmu thei lo maw. Na fanu in ka tuarthiam lo, ra thosal aw. Tuisun ah kan biaaw ding, kan hmuaw ding ka ti nan ka lo bia ngah lo, na mithmai khal ka hmu ngah lo. Na fanu hi in fehsan hram hlah aw…” tin a ṭap rero.

Be the first to comment

Leave a Reply

Your email address will not be published.


*