Ramlak Ihsin Ara Tlung Ih An Runinn Te Cu Vutcam Ah Arak Cang, Bawmtu An Vai

June 15, 2021 ah ralkap in Magway Division, Kinma khuasen ih inn zaten an urkang thluh ih an khua cu vutcam ah a cang. Sun nazi 3:00 hrawngah ralkap tam zet cu Kinma khua nuai dingin an va feh ih khuasung mipi pawl cu thlaphang in ramlakah an tlanlut.

Tlansuak ve thei lo pitar, putar, damlo pawl cu ‘kan ra lo hruaisal ding’ tin an tiamkam ih innsung ah an kharkhum, ni 2/3 an rawlei ding pawl cu an tuahsak cia.

Asinan, nunrawng ralkap pawlin zangfahnak nei loin an inn le innsung ih um pitar, putar, damlo pawl cu an rak urkang that thluh.

Kum 36 mi khuasung mi in “Ka pi khal a tel, ralkap pawl an ra ti kan theih veten kan tlansuak. Tlansuak thei lo ka pi cu innsung ah kan tan. Tuizan ei ding, thaisun ei ding rawl pawl cu kan tuahsak thluh cia ih inn lenglam ihsin tawh in kan kalh. Asinan kan inn an urkang ih ka pi khal a kang that” a ti.

An rannung vulhmi pawl khal an kang that thluh, ralkap pawl an tlan hnuah ramlak ihsin an va tlung cu umnak ding an nei nawn lo. Sungkimten an rak lawinak runinn te cu vutcam ah a cang, bawmtu khal an nei lo ih mitthli thawn khua an cuan rero. (Pray for Kinma)

Be the first to comment

Leave a Reply

Your email address will not be published.


*