Rampi Thurawn Petu Le Suu Kyi Thurawn Petu Cu Kum 7 Sung Thawngtla Dingin A Thu An Ṭhencat

Myanmar rampi thurawn petu le Aung San Suu Kyi ih Personal Officer Zaw Naing Win cu ralkap in kum 7 sung thawngtla dingin a thu an ṭhencat.

Zaw Naing Win cu Russia ramih fimthiamnak zirsuak a si ih ralkap captain khal arak ṭuan zo, ralkap captain ihsin a cawl ih a fimthiamnak ruangah Minister of Foreign Affairs a ṭuan.

Cun, Myanmar rampi thurawn petu khal a ṭuan, cumi hnuah Aung San Suu Kyi in a ai arung awh ih Zaw Naing Win cu Suu Kyi thurawn petu ah a cang.

Myanmar ralkap in thuneihnak an lak veten Ministry of Foreign Affairs zung ah bannak ca a thehlut cih, February thla sungah Free Daw Aung San Su Kyi timi capi kengin lamzawhnak ah a tel.

Cumi hnuah CDM tuah cozah hnaṭuan pawl khal a bawm, CDM tuah cozah hnaṭuan pawl cu sumpai an ngah theinak dingah a tawlrel sak tin ralkap pawlin an kai. Ralkap in pukmah 409 in thubuai an orhter ih kum 7 sung thawngtla dingin a thu an ṭhencat.

Be the first to comment

Leave a Reply

Your email address will not be published.


*