Rialti Khua Kiangih Mithi Ruak An Hmuhmi Cu CDM Tuah Sibawi A Si

October 23, 2021 ah Falam peng, Rialti khua kiang hramrul lakah mithi ruak pakhat an hmu ih a ṭawih deuh zo ruangah zo a si ti an thei lo lawk. Falam COVID Volunteer pawlin Lungpi vengih nat zohfelnak an nei lai ah Rialti khua ih meisa kaang inn kiangah zobik tiih theih lomi ruak pakhat a um thu an thei ih Thlanrawn mino pawl thawn va sar in Lungpi Baptist Church pastor Saya David ih thlacamnak in an vuiliam.

Ruak sarnak ih teltu Salai Nhgepi cun, “Mipa a si ti lawng simfiang a theih thlang, a hmel ah vun (skin) a um nawn loih a luu lam cu ruh lawng a taang zo. A rim khal a suak tuk zo ih a taksa ah tla pa-ngang (zang) nih an ei thluh tikah hminsinnak dang le theihthiam theinak dang kan hawl thei nawn lo” tin Chinland Herald thuthang sungah an tarlang.

Cuih mithi ruak cu lehhnu ih sungkhat unau pawlin zobik a si timi an theih saal tikah a ruh-ro pawl țhawn saal thei dingin pengțhuam 144 KM kiangah an vui thu pawl theih a si. October 24, 2021 sun ahcun zo a si ti an theifiang zo, tlangval kum 20 hrawng mi Naing Htoo Lwin a si ih CDM tuah in CNF/A ah a lut.

CNF thuthang phuangtu Salai Htet Ni in “Magway khuami a si ih CDM tuah sibawi final year zirlai Naing Htoo Lwin a si. Bo khat rank kan pek mi a si. Falam peng sung doawknak ah hliamtuar an umsual ding tin tuamhlawm dingin a poksuak. A rualpi pawl an ra kir tikah cun anih cu a tello, kan phone ih veikhat cu a kai nan neta ahcun phone a kai nawn lo. Kawl ralkap pawlin an thatmi a si ko ding” tin The Hakha Time hnenah a sim thei.

CNF/CNA in upatnak le an riahsiatnak pawl an tarlang, cun a tlawngkainak tlawnginn lam khalin ralkap pawl dothlennak ah paralṭha tin cawimawinak an hlan ih an riahsiatnak thu pawl an tarlang.

Be the first to comment

Leave a Reply

Your email address will not be published.


*