Rinum Zetin Ralkap A Ṭuan Nan Bawm A Ṭul Tikah An Rak Phatsan Ih A Thi

Kum 60 mi Myint Oo cu Myanmar ralkap rinum zet pakhat a si. Kum 32 liamzo ah ralkap captain arak ṭuan ih NLD pawl a hua tuk. April 4, 1989 ah Daw Aung San Suu Kyi in Ayeyarwady Region, Danubyu ah NLD campaign a tuah ih mipi khal an tam zet.

Lamzin ih an feh lai cu Captain Myint Oo ih hohanak in ralkap pawlin lamzin an rak kham. Myint Oo in mipi pawl a hringhro hnuah nan ra fehnai asilen kan lo kap ding a ti. A kuthnuai ralkap pawlin meithal in an tin thepthep ih Myint Oo ih thupek lawng an hngak.

Daw Aung San Suu Kyi cu hmailam pan in ava feh vivo laitak ah Myint Oo in phone call a dawng thutthi. Tlunlam ralbawipi ih phone call a si ih “Kap hlah uh, doawknak tualrawn a si lo. Ramkhel thuhla a si hi” tin thu arun pek ruangah an kapsal lo.

Captain Myint Oo cu a thinheng tuk ih a hmun ah a kor parih a captain sinak ca’ben cu a dir tla, a captain sinak ca’ben a dirtla nan ralkap cu a ṭuan vivo lai thotho. Captain Myint Oo in “Tlunlam ihsin thupek kan dawng zo ruangah Daw Aung San Suu Kyi le a dungthluntu pawl cu kah rori ka tum. Kei cu rinum zet ih thupek thluntu ralkap ka si” a ti.

Cun, a captain sinak ca’ben a dirhtlaknak thuhla an sutsal ih Myint Oo in “Tlunlam pawlin anmai thusuahmi khal an thlun lo ruangah ka thinheng tuk” a ti. Rinum zetin ralkap ah a ṭuan vivo ih 1992 kum ahcun Irrigation Ministry ah a kaisang, ralkap sinak sang zet kai in a pension.

A pension hnu khalah NLD le Daw Aung San Suu Kyi cu a do zet lai ih a facebook cahmai fehtlangin a soisel ṭheu. July 18, 2021 ah a damlo bese tuk ruangah Yangon ih ralkap siizung picang, ihkhun 1,000 umnak ah ava feh ih an rak cohlang lo.

Cutawk ih duty-tu ralkap officer pawlin an rak kawk ciamco ruangah beidong zetin an kirsal, rinum zet ih hna arak ṭuan reronak ralkap pawlin a damlo caan, bawm a ṭul caan ih an rak cohlang lo ruangah a ningna tuk.

A facebook cahmai ah “Kum reipi sung a hring (ralkap) hrangah hna ka rak ṭuan zo ih a sen (NLD) ahcun ka lut duh hrih cuang lo…” tin a ningnat thu pawl a tarlang.

Ni 2 hnuah Covid-19 an test ih a positive ti an hmusuak ih Covid-19 center ah an tuamhlawm, ralkap dang pawlin a thuhla an theih ruangah an va hruaisal ih Hmawbi ih ralkap siizung ah an tuamhlawm. Asinan ṭhah lam a pan thei cuang lo ih July 24 ah a duhdawt zetmi ralkap siizung ihsin leitlun a suahsan.

Be the first to comment

Leave a Reply

Your email address will not be published.


*