Ro Thuhla Ruangah Hringtu A Nu A That, A Sa A Candip

Malaysia, Perak ih um mipa kum 42 mi in rozem thuhla ah a lungawi lo ih hringtu a nu kum 68 mi cu a that. A sa cu hmun 15 ah a candip ih an inn dunglam tidai sia retnak tank sungah a hlon. A pa in a thih hlanah ro a zem ta, a pa in a thihsan hnuah a nui thawn kum 12 sung an umtlang.

A nu thawn khualak ah bursia an hawl ṭheu ih an inn cu a bal in a rimsia. May 28 sun ah hmun dangih um a farnu in palik sakhan ah mihlo thubuai a thehlut, a farnu in nitinten a nu hi a phone ṭheu. Himi sun ah a tapa in phone arak kai ih, “Ka nu aum lo, innleng ah a suak lawk. Ara tlung cing ding” a ti.

Palik pawlin thusutnak khal an nei nan a nu umnak cu an thei lo. June 4 sun ah an innhnen pawlin thilrim sia tuk an thei ih palik hnenah an theihter, palik pawlin thil rimsia cu an hawl ih an tidai sia retnak sungah minung sa candip mi an hmu, tualthattu khal palik pawlin an kai ih palik bawi in a thluak fehdan a diklo a ti.

Palik bawi in, “A pa thi zo ih rozem thuhla ah a lungawi lo ruangah a nu a that. A lu ah a vuak ih a tlu, cumi hnuah nam in a candip. An inn dunglam tidai sia retnak sungah mithi ruak cu kan hmu, tualthattu khal kan kai hngal” a ti.

Be the first to comment

Leave a Reply

Your email address will not be published.


*