Ruah A Sur Ringring Ruangah Raltlan Pawlin Tidai Thiang In Ding An Nei Lo, Sungdawk Nat A Tam

Myanmar ramsung hmuntinkim ah doawknak a thleng rero lai, khuasung mipi pawl cu sahimnak hawl in hmun dangdang ah an tlan. Kachin ralkap KIA le ralkap pawl an doawknak ruangah minung a thawngtel cu raltlan in an um.

Ṭhenkhat cu Myitkyina lamah an rak tlan man. Asinan, ralkap in lamzin pawl an phit thluh ruangah hmun hlanpi ih tlansuak thei lo pitar, putar nauhak pawl cu ramlak ah an khuasa. Bumra Yang ramlak raltlan sakhan ah an um ih, tulai ruah a cen nasa tuk ruangah buainak nasa zet an tong.

Furcaan a si ih ruahti a tam ruangah tidai thiang in ding an nei lo, rawlsuangnak hrang khalah tidai thiang hmang ding an nei lo ruangah an buai zet.

Tidai thiang lo an hmang ruangah sungdawk le damlonak phunphun an neih phah. Harsat zetin mibawmtu pawlkom Kachin Backpack Health Worker Team in an va vehvai ih tidai thiang in ding an ṭul tuk tin lenglam mipi pawl hnenah an sim thei, an umnak hmun ah mibawmtu pawlkom dang an thleng thei hrih lo.

Kachin Backpack Health Worker Team pawl lawngin an buaipi rero lai. Ṭuanvo neitu in “Raltlan lakah pitar, putar nauhak tete khal an um, naupai khal an um. Ruahsur laitak a si ih a hlan hnakin bawm an ṭul tuk” a ti.

Be the first to comment

Leave a Reply

Your email address will not be published.


*