Sagaing Ramsung Ah PDF Pawl An Cak Deuhdeuh Ruangah Min Aung Hlaing In Special Ralkap Pawl A Kuat

Myanmar ramsung buainak ah Sagaing, Chin ram le Magway ramsung ih mipi kilhimtu pawl ih thazang a cak deuhdeuh. Sagaing ramsung ah doawknak nasa zet a thleng zo ih ralkap pawl an duai ringring.

Curuangah Sagaing, Chin ram le Magway ramsung ih ralkap pawl hotu cu an inn ah an kharhkhum ih misual hminthang ralbawi an timi Lieutenant General Than Hlaing an kuat. Lieutenant General Than Hlaing ih tomi motor khal PDF pawlin bomb in an rak puah ruangah a lu ah hliamhma a tuar.

October 27, 2021 zingpit nazi 2:00 ah Kawlin-PDF in ralkap 100 hrawng umnak pahnih cu veilehkhat ah pukpi le meithal in an va kap ciamco ih ralkap 40 an thi. October 28, 2021 sun ah hmun dangih um Alaung Min Special Operation pawl cu Sagaing ramsung ih um PDF pawl nuai dingin an kuat.

Helicopter 6 le doawknak vanzam thawn an poksuak ih, an hotu in Sagaing ramsung thianfai dingin forhfialnak a nei. Sagaing lamzin ah ralkap motor bomb puah tong an rak tam tuk zo ruangah tlunlam ihsin an herkual rero thlang. Sagaing ramsung ah ziangtin caan an va hmang ding ti cu theih a si hrih lo.

Sagaing, Chin ram le Magway ramsung ih um ralkap pawl hotu thar misual hminthang ralbawi Lieutenant General Than Hlaing in “Himi ramsung ih um PDF zaten nuai cimit thluh uh. An thi siseh, an nungdam ih nan kai ngah asikhallen nuai cimit thluh uh. Na duhmi ralkap pawl nan hruaisuak thei, lei ralkap, van ralkap, tank motor, ziangvek ralthuam khal nan hmang thei thluh. PDF zaten nan that thluh hnu lawngah Nay Pyi Taw ah ra kir uh” tin order a pe.

Be the first to comment

Leave a Reply

Your email address will not be published.


*