Thailand, Phang Nga province ah kum 10 mi sai / vui in hnaṭuan fial rerotu a pu cu a soisa, a ho in a taksa hi hmunhnih ah a dir phel. An pu cu a hmun ah a thi cih, thisen lakah a taksa phel cu aum. Sai hmin cu Pom Pam a si. An pu cu kum 32 mi Supachai a si. Himi sun ah ni a sa tuk, sai cu thing tam zet a thiarter rero ruangah a thinheng ih a pu cu a that.
Ṭuanvo neitu pawlin sai cu ithmuh sii in an kap hnuah mithi ruak cu an la. Thailand ram ah sai in minung an that thuhla hi theih ding aum tuk lemlo. Asinan, an cau caan, hmuhsuam an tong ahcun minung an soisa ṭheu. 2020 kum sungah sai in minung 20 hrawng an that.
June 9, 2022 khalah India, Odisha ih um nunau kum 68 mi cu sai in a pal that. An hmuan ah tidai a pe rero laiah sai in ava pal that, khuasung mipi pawlin mithi ruak cu an la ih siizung ah zohdiknak an nei, cumi hnuah mithi ruak cu an inn ah an tlunpi.
Vuinak caanserh an hmang rero laiah sai in ava tibuai ih mithi ruak cu a pal ciamco bet. India ramsung ah kumtinten sai in minung 100 hrawng an that ṭheu. Odisha ramsung ah sai ruangih thi an tambik, 2014-2021 kum karlak ah sai in minung 600 hrawng an that tin an ngankhum.
Leave a Reply