Thailand, Pathum Thani province ah sammet sualnak ruangah thatawknak a thleng. August 20, 2022 sun ah kum 41 mi Warisara le a pasal kum 40 mi Wirapong cu an fanu kum 8 mi hruai in Tesco Lotus shopping centre ah an va feh.
Warisara tei nupa hi “Fah Mee Ta” timi zuknung sungah an tel. PIMMY Hair Salon dawr ah innsung nubik Wirapong cu sam a met, a pasal le a fanu cu dawr dangdang ah an rak fehkual. Sammetnak dawr ah an va kirsal, sam an met ṭheh hnuah Warisara in an sammet cu a lungkim lo.
“Ka lo simdan vekin nan met lo, a tawi tuk. Hivek ih samtawi in ka met dah lo” tin an buai. Sammet man ah 250 baht an pe zo. Sammettu in “ṭhaten ka lo remsal ding. Kan dawr sungah thilri bungrua a kim lo ruangah dawr dangah kan va met ding” a ti.
Warisara in dawr neitu kum 51 mi Prasart Rangyai cu a phone ih a sammetnak ah a lungawi lo thu pawl a sim thei. Dawr neitu in, “Tuah theimi zianghman ka nei lo” a tiih an buai deuhdeuh. Warisara tei nupa in ‘Ṭhaten nan remsal thei lo asilen sammet man in pesal uh. Sammet man in lo asilen palik hnenah taza kan lo cuai ding” an tiih dawr neitu in, “Thih nan duh maw si?” tin a hro.
Dawr neitu cu bike thawn an dawr lamah a tlan hngal, namtong a keng cia. An dawr kawt ih um Warisara cu nam in a dawt, a pasal in arak run ruangah a pasal khal a dawt that. An fanute hmuh laiah Warisara tei nupa cu a that ih hmundang ah a tlanhlo.
Palik pawlin CCTV an zohnak ah Warisara tei nupa cu dawr hmaiah reipi an dingih thu an rel rero lai an hmu. A thaizing ah tualthattu Prasart Rangyai cu palik sakhan ah a ap aw ih ‘Sammet man 250 baht an khirhsal duh lo ruangah buainak a thleng. Sumpai a tingtel cawicop in dawr a tuah ih hivek buainak a thleng ruangah a supawk thei lo thu pawl a phuang aw.
A thinheng tuk ruangah nam in a dawt, an thi ding ti a zum lo thu pawl a rel. Mithi ruak pahnih cu siizung ah an phur ih zohziknak an nei rero. Prasart Rangyai cu a nupi in 500,000 baht in reilote sung tlensuak dingin ava dil ih an siang, asinan a kut ah aumnak khihhmuhtu electronic monitoring (EM) an hren. A thuhla cu court in an buaipi rero lai ih thuṭhennak felfai an tuah leh ding.
Leave a Reply