Sammet Thiam Hminthang Khal Kaihci Aiah Meithal A Keng Thlang

Tlangval kum 26 mi Alfie cu sammet thiam/hairstylist hminthang zet a si, mino tam zetin a hnenah sammet dan an zir ṭheu. Kachin miphun a si ih Yangon ah aum, ralkap in thuneihnak an lak veten lamzawhnak ah a tel ih ralkap cozah cu a phunphun in a do.

Asinan, Myanmar ralkap pawl cu daiten do cing an si lo tin meithal keng in a do tum thlang, ramri hmunhimnak pakhat ah aum ih doawkdan a zir rero lai.

Alfie in “Khuasung ih dothlennak le ramlak ih dothlennak cu a bangaw, meithal keng le keng lo lawng a si. Kan zaten nunnak thapin kan do, People Defend Force (PDF) ihsin ka rak lo hmuak” a ti.

A tumtahmi cu ralkap pawl do ih neh hi a si. Alfie in “Inn tlung ka cak, a hlan ih ka hnaṭuanmi tla ka ṭuan cak thlang. Hnaṭuan cawlh caan ah bar feh, club feh, khualtlawng, zalen zet ih hringnun hmang a cak um thlang. Tui dothlennak hi ziangtik tiang a rei ding ti ka thei lo, kan neh tengteng a ṭul.

Zuk pawl kan tarlang ruangah kan him nawn lo, inn kan tlung ngam nawn lo ding tivekin ruat hlah uh. Zalen zet ih tlungsal thei dingin ral kan do rero lai, a hlan ih doawknak vek a si nawn lo. Lungrualten kan do tlang dingih kum 2 ai a rei lo ding.

Ka fala, ka innsang, rualpi le ka tumtahmi pawl aiin rampi ka duhdawt sawn, thudik lamah dingin ral kan do. People Defend Force (PDF) timi cu kanmah Generation Z mino pawl hi kan si” a ti.

Myanmar ramsung buainak ruangah milar tam zet cu hriamkai in hmunhimnak ah an um zo, Myanmar milar ṭhenkhat hriamkai pawl cu Htar Htet Htet, Makeup Artist May Oo, Miss Golden Land Myanmar ih CEO & Founder Han Lin, Wai Yan Aung, Han Zaw Latt le capohthiam Tai Kyaw pawl an si.

Be the first to comment

Leave a Reply

Your email address will not be published.


*