South African Satanic Church dintu le Satanic Church pastor Riaan Swiegelaar cu Setan biaknak ihsin a suak. Mipi in a suahnak san hi an sut rero ruangah July 4, 2022 ah video fehtlang ihsin a phuang.
Riaan Swiegelaar hi kum 20 lianzo ah Pathian rawngbawltu pakhat arak si, asinan a hringnun ah beidonnak, lungkuainak phunphun a tong ruangah biaknak nei lo, sakhuanak nei lo ah a cang. Cutin, sinak bang kop aw ah a tel ih Setan bia in kawhhran a din.
Kum 4 sung Setan rawng a bawl hnuah a hringnun cu a thleng danglam sal ih Jesuh dungthlun in rawngbawlnak ah a tel vivo ding thu a phuang. Riaan in, “Daiten Setan pawlkom ihsin suah ka tum nan mipi in an rak thei thotho. In suttu an tam tuk ruangah midang khalin hlawknak an rak hmuh thei pang ah tin ka phuang ding.
South African Satanic Church dintu ka si. Veikhat cu media pawlin thu in sutnak ah “Jesuh hi ka zum lo. Jesuh hi aum taktak ding ti khal ka zum lo” tin huaisen zetin ka ṭongsuak. Interview kan ṭheh veten nunau pakhat in in ra pom ih duhdawtnak le lainatnak nasa zet a langter ih ka mangbang tuk.
WhatsApp fehtlang in in bia ṭheu ih duhdawtnak le lainatnak a langter ringring, a WhatsApp status ka zoh ih Christian mi a si ti ka thei. Kei cu misual, khawsia, mi ṭihnung um zet ka si nan ka parah Christian mi pakhat in duhdawtnak le lainatnak a langter ringring cu ka thinlung a tibuai.
Ka hringnun ah hivek ih duhdawtnak thawn in pehtlaihtu ka tong hrih lo. Setan rawng ka bawl laiah Christian mi 4 lawngin duhdawtnak le lainatnak an langter ṭheu, catbang loin in ngaihsak ruangah ka hringnun cu thleng danglam in ka um.
Kei cu misual tuk ka si, Pathian duhdawtnak khal cotlak ah ka ruat aw lo nan duhdawtnak thawn in pehtlaih ringring ruangah ka hringnun cu a thleng danglam aw. An parah lungawithu ka sim duh. Zankhat cu thawinak ka tuah laiah Jesuh ara lang ih ka lau tuk.
Jesuh na si ngai asilen tettinak pakhat khat in hmuh aw ka ti, duhdawtnak thawn in pehtlaih. Interview ṭheh ih in pomtu nunau ih duhdawtnak vekin Jesuh in in pehtlaih ve, himi ni ihsin Jesuh ih duhdawtnak ka tep ngah ih ka piangthar. Pathian uknak ram cu pawlkom pakhat, sakhua pakhat hrang lawng a si lo. Pathian uknak cu mipi zaten hrangah sangka an ong ringring, Jesuh dungthlun in ka feh vivo thlang ding” a ti.
Leave a Reply