Sii Lei Dingin Mipi 1000 Lenglo An Tlaraw Ih Ralkap In Siidawr An Kharter

Yangon, South Okkalapa, Nandawan Market kiangih um Shwe Oo siidawr ah sii lei dingin mipi 1000 lenglo an tlaraw cu ralkap le palik pawlin Covid-19 daan le dun nan pahbal tin an dawitlan thluh hnuah siidawr khal an kharter.

Himi siidawr ah (Enoxaparin Sodium Injection) 0.4/0.6 siivai cu mipi zawnruah in man awlten an zuar ruangah siivai lei dingin mipi an tlaraw ṭheu. Zinglam nazi 4:00 ihsin siivai lei dingin an tlaraw zo.

Dawr dang ahcun 20000 & 50000 in an zuar ih Shwe Oo dawr ahcun pangaiten 8900 in an zuar. ESI siivai cu Covid-19 damlo pawl hrang a si, sibawi ih fialmi siivai a si ih Covid-19 damlo kum upa pawl cun an dawtawk tengteng a ṭulmi a si.

Sii lei dingih tlaraw tu pakhat in “Zinglam nazi 5:00 ah ka va thleng ih mipi cu an rak tamtuk zo, tlaraw khal an tamtuk. Ralkap 20 hrawng le palik motor an ra thleng ih tlung thluh uh in ti. Siidawr khal an kharter” a ti.

Siivai lei ngah lo ih an tlungsal ruangah innlam ih um Covid-19 damlo bese pawlin an tuar phah zet ding. Thuneihnak latu ralkap in oxygen cet zung pawl khal mipi hrang oxygen thunsak lo dingin an rak fial zo, damlo pawl bawmtu mipi khal an vuak ih an kai ṭheu ruangah Covid-19 damlo pawlin an tuar phah zet.

Be the first to comment

Leave a Reply

Your email address will not be published.


*