Siizung Hnaṭuantu In Mithi Ruak 100 Hrawng A Pawngsual

England, Tunbridge Wells Hospital sungih meisa tuahtu (electrician) in morgues sungih an ret ṭhami mithi ruak 100 hrawng arak pawngsual zo. A pawngsualmi mithi ruak nauhak bik cu kum 9 mi a si ih upabik cu kum 100 mi a si.

Kum 67 mi David Fuller cu nupi neilai a si ih innsang khal anei, cuti cingin mithi ruak arak sualpi ṭheu. An innsang le an vengsung ahcun mitha zet a si. Sinak mizia pahnih nei minung a si, vengsung ahcun miṭha zet a si nan mithi ruak lakah cun thlahrang vek a si. Siizung ih a hnaṭuannak khal a rei tuk zo ruangah an ṭihzah in an upat zetmi a si ih mithi ruak an retnak khan sungah cun a duh tiktik caan ah a lut thei.

Ṭhenkhat mithi ruak cu vei tampi arak sualpi man, ṭhenkhat cu an nulepa in an va ṭah ciamco ih an tlung veten arak sualpi. Lusun innsang pawlin mithi ruak umdan a diklo an ti ṭheu ruangah an zingzoi vivo cu pawngsual an si thu an theisuak.

An hmuhmi mipa tii DNA fehtlangin an zingzoi ih David Fuller cu an kai, an kaih tik khalah zianghman theilo bangin daiten arak um. An innsung lam an va zohdik ih mithi ruak a pawngsualmi pawl ih hmin le thuhla cipciar cu a cabu te sungah arak ngankhum thluh mi an hmu. A ngankhum mi cu mithi ruak 80 a si nan cu aiin a tam ding ti an zum.

Kum 30 sungah vei tampi thilsual a tuah ding ti an zum ruangah a sulhnu pawl an zingzoi rero lai. Mithi ruak a pawngsual lawng siloin kum 30 liamzo ah nunau pahnih arak that zo ti khal DNA fehtlang in an theisuak. 1987 kum ah fala Wendy Knell le Caroline Pierce cu arak that ih a sualpi, an thih hnuah a pawngsual ih a zawnsan si ding ti an zum.

Wendy Knell le Caroline Pierce thattu cu palik pawlin kum 30 lenglo an rak hawl rero nan an hmu thei lo, asinan mithi ruak pawngsualtu an kaih hnu ihsin ziangkim an pehtlaih aw thluh ti an theisuak ih a phuntawk hremnak pe dingin an tawlrel rero lai.

A pawngsualmi mithi ruak pakhat ih nu in “Nunau pawngsualmi pawlin au-aw an nei thluh, ka fanu khalin au-aw anei ve. Ka fanu hrangah ka ausuak ding” a ti. Arak thatmi Wendy Knell le Caroline Pierce tei innsang pawl khal palik le ṭuanvo neitu pawlin tualthattu cu an hawl hmu thei lo nan beidong loin kum 30 lenglo an rak zingzoi rero. An innsang pawlin “Tualthattu an kai ngah zo ti in sim thei cu kan lau tuk. Himi ni a thleng ding ti cu kan rak ruat thei nawn lo” an ti.

Be the first to comment

Leave a Reply

Your email address will not be published.


*