Singapore Ah Hnaṭuan Dingin A Feh Tum Ih Bum A Tong

Myanmar ramsung buainak ah mino pawl cu PDF ah an lut ih zalennak ngah dingin ralhrang pawl an do rero lai. Fala, nunau pawl cu ramdang dang ah hnaṭuan ding hawlin an poksuak, raltlan ih um aicun ramdang ih hnaṭuan an hril sawn.

Cumi lakah mibum dingin cangvaitu khal an rak um. Mipa kum 25 kiangkap hrawng mi (4) khal puaisa ih bum an tong ih pakhat ah ting 50 hrawng an sung thluh. An inn le lo, caw le hmuan zuar in ramdang feh an tum nan bum an tong ruangah ramdang feh ngah loin an khua ah an tlungsal.

Kayin State, Daw Nga Kha vengsung ih um fala kum 18 mi Natasha khal a hmeltheih pakhat in Singapore feh dingin a tawlrel sak ih puaisa bum hmang an tong ngah. A thupten hmatpungtin an tuahsak ih ting 4 an ngen, cutin April 23 ah Singapore ram ih feh dingin an ti.

April 20 ah Yangon, Hlaing Township ah ava feh ih inn khan pakhat sungah an kharhkhum. Innkhan sung ahcun nunau 30 hrawng an rak umcia, interview an tuahter ih an vaw ṭheu. Leng vahsuah khal an siang lo ih an room cu tawh in an kalh ringring, ‘ramdang ka feh duhsal lo, kan khua ah ka tlung duh’ a tiih an siang lo.

Ni 5 hnuah rawl pe dingin sangka an ong ih cutawk ah a tlansuak thei, cutin an khua ah a tlungsal ih khan sungih um nunau pawl cu a seherh tuk thu a rel. Ziangtin an um vivo ding ti a ruahnak ah a thinhar tuk. “Tulai ramsung buainak lakah suamhmang, mibum dingin cangvaitu an tam tuk ruangah ramdang nan feh ding tik ah fimkhur cio uh” tin an tarlang.

Be the first to comment

Leave a Reply

Your email address will not be published.


*