Singapore Feh Zik Chin Tlangval Cu Yangon Bomb Puak Ah Hliamhma Nazet A Tuar

May 21, 2022 ah Yangon bus cawlhhmun ah bomb a puak, minung tam zet umnak hmun ah bomb a puak ih mi (1) a thi, mi (9) in hliamhma nazet an tuar.

Hliamhma tuar lakah Chin tlangval kum 23 mi Tg Cin Sian Suum a tel. Kalaymyo ih um a si ih June thla ah Singapore feh ding a si ih Yangon ihsin a hngak.

Bomb puak ruangah a thin le a cuap a siatsuah, Yangon siizung ah a thin an at ih a cuap operation dingin an um lai.

Thudang: Apostles 12 Thih Dan Kimcang In >>>
“Pathian kamsuakthu nan hnenih a lo simtu, nan hotupawl kha cîng ringring uh, an nuncan rahsuah ruatin an zumnak cu cawng uh”. (Hebru 13:7)

(1). BARTHOLOMEW
Bartholomew hi Mesopotamia (Iraq) le Persia (Iran), Turkey, Mrmenia le India ah thuthangṭha sim. Derbent (Azerbaijan, Russia kiangih um) timi Caspian Sea ih um mi tampi Khristian ih a hruailut ruangah an siangpahrang ih thupeknak in 70 A.D ah nung cingin “a vun lipsak” a si ih, cutin “a lu tansak” a si. Bartholomew ih vun le ruh hrekkhat hi Rom ram ih The Basilica of St. Bartholomew ah ret a si ih, a luhruh hrekhat hi Frankfurt le Germany ah, a kut cu England ih Canterbury Cathedral ah upat sunlawihnak hrangah ret that a si.

(2). JAMES
James (Alfias fapa) hi Damascus (Syria) ah thuthangtha a sim, Jerusalem (Israel) ih Bishop hmaisabik tiih kawh a si. Jews pawl ih daan dokalh ih thuthangṭha a sim ruangah le, Jews Community tampi Khristian ih a hruai lut ruangah lungto in deen a si ih, a thih hlante ah talhbelh in mipi lakih mi pakhat in a thawi ih cutin 63 A.D a thi, a thihnak hmun (Jerusalem) ah phum a si.

(3). ANDREW
Andrew hi Georgia (Russia), Istanbul (Turkey), Macedonia le a netabik Greece ah thuthangṭha a sim. Patras, Greece ih ram uktu (Governor) Aegiatis cun a innsang le sungkua pawl Khristian ih an can ruangah a thinheng in Andrew cu a biaknak, zumnak phatsan dingin mipi hmaiah a fial. Asinan Andrew cun a zumnak a phatsan thei lo ruangah X thinglamtah ah hripi thawn tawnbep a si. A thih hlan ni thum sungah thinglamtah par in thu a sim ih mi tampi in an zum. A thih hnu ah a taksa then pawl cu Constantinople (Turkey) le Scotland (United Kingdom), a luruh cu a tuarnak hmun Patras, Greece ah ret a si.

(4). PETER
Peter hi Jerusalem (Israel) ih Khristian pawl hotubik tiih theih a si. King Herod Agrippa I in Jerualem ih Khristian pawl (himi tum ah Apostle James ih lu tan a si) hrem ding ih thu a pek tikah Peter cun khawpi a suahsan. Cutin Judea (Palestine) le Antioch (Syria) ah thuthangṭha a sim vivo. Cuih hnu ah Rome ah a feh ih thu a simnak ah mi thawng tampi Khristian ah an cang. Himi san laiah Rome ram sung mi tam zet Khristian an luh ruangah Rome Lal Nero a thinheng ih zumtu pawl cu ‘tualrawn ah ramsa pawl ih ei dingah a suahter’, meisa a thawn a ur hai. An lakih hotubik Peter cu thinglamtah ah thlaithat a si, Amah ih dilnak vekin thinglamtah ah linglet rori ih thlai ih a si ih 64 A.D ah Martyr in a thi.

(5). JOHN
John hi a caan tam sawn cu Peter thawn Jerusalem ah a hmang, Herod Agrippa I in zumtu pawl a hrem tiang a um. Tawk fangin Asia Minor (Turkey kiangkap) ah a feh ih, cuih hnu ah Rome ah a lut ih zumtu dang pawl thawn hmun khat ah hremnak a tuar. Siiti so burhbo sungah caan rei zet an thlak ih a thi thei lo, curuangah Rom Lal Dominitian in ram sungah um awih lo in a dawi ih Patmos tikulh (Greece) ah a umter. Patmos tikulh hi ram sung um thei nawn lo ih dawimi pawl umnak a si. Hi tawkah John in Pathian hnen ihsin thu a dong, cuih thu cu Thuphuan cabu a si (Dawinak hmun ah a thleng nan, vaanlam thu a donak hmun ah a cang). Dominitian a thih in Ephesus (Turkey) ah a kirsaal ih a caan netabik tiang zumtu pawl thawn caan a hmang ih 95 A.D kiangkap ah tarkuun in a thi. John hi thi ding rori in hremnak rapthlak zet a tuar nan a thi lo, Pathian in tumtah a nei.

(6). THOMAS
Thomas hi Khristian tampi in ‘rinhlehnak neitu Thomas’ tiih theih a si. Asinan Jesuh ih thawhsaalnak a tak rori ih a hmuh ngah tikah raalṭhatnak thawn a khat ih thuthangṭha simnak le Kawhhran din vivo in caan a hmang. Cutin Roman Empire uknak leng (Europe leng) tiang, Babylon (Iraq) ah Kawhhran a din, Persia (Iran) le China le India tiangin thuthang a sim. Thomas hi Brahmins timi India biaknak puithiam, siangpahrang thuron petu pawl parah a lungawi lo. Ziangahtile Khristian zumnak hi India ram buaitertu le phunhnam thleidanawknak an neihmi dodaaltu tiih an hmuh ruangah a si. Mylapore, India ah siangpahrang Masdai thupeknak vekin thah ding a si. Cutin tlangpar ah hruai a si ih feipi thawn sunthat a si hnu ah Madras, India ah phum a si. 70 A.D ah Martyr in Jesuh Khrih hrangah a nunnak petu mi ropi a si.

(7). JAMES
James hi (Zebedi fapa, John ih nunau) Iberia (Spain kiangkap) ah thuthangṭha sim in ahmaisabik thuthangṭha thlentertu a si. Mary ih sawmnak vekin Judea ah (Israel kiangkap) ah dungtluntu le zumtu dang pawl thazaang petu dingah a feh. Herod Agrippa 1 in Jews hruaitu pawl lungawiter duh ah James cu a kaihter ih James ih lutanter dingin a fial. Amah sual a phuhtu lakih hotubik pakhat cu a thinlung a thlengih James hnenih thi ve dingin a pe aw. Cutin 44-45 A.D kiangkap ah Jesuh Khrih le thuthangṭha ruangah James cu a lu tansak a si. A thih hnu ah James ih taksa ruang cu Spain ah phurh saal a si ih atu ih Cathdral of Santiago de Compostela timi hmun ah phum a si.

(8). PHILIP
Philip hi Greece, Syria le Turkey (Galatia, Phurgia le Hierapolis khawpi pawl ah) thuthangṭha a sim, Bartholomew thawn a tam sawn an tuan tlang. Mina damternak le thuthangtha simnak ruangah Hierapolis ih ram uktu ih nupi cu Khristian ah a cang. Curuangah ram uktu thinheng cun Phillip le Bartholomew cu hrem le that (thinglamtah in thlai) dingin thu a pek. Thinglamtah parih thlai an si laiah, a thih hlan sung thuthangṭha a simnak in mi tampi Khristian ah an cang ih Barthalomew tla an thlah saal (Barthalomew hi neta ahcun Martyr in a thisaal). Cutin Philip hi lung ih den, thawi le thawngthlak a tuar hnu ah 54 A.D ah thinglamtah ah thlaithat a si ih khawpi sungah phum a si.

(9). MATTHEW
Matthew hi Siangkhong milian le mi zirsang a si ih Ethiopia (Africa), Judea (Israel), Macedonia, Syria le Parthia (saklam Iran) pawl ah thuthangṭha simnak a nei. Cutin a thlennak hmun khat ah mi tampi in Khristian an lut ruangah an siangpahrang thinheng cun Matthew cu a kaihter ih, ihkhun parah an khenbetcih, ‘cahnah’ thawn an tuam thluh ih ‘kaat’ le ‘siiti’, ‘kaataza’ le ‘thinghge tommi’ thawn an urcih. Mangbangza a simi cu,a thihnak ihkhun a dai ngahtu in mangbangza in damnak an co, cutin a thih hnu ah mi tampi Khristian ah an cang, amah a that fialtu rori khal sualsir in Khristian pacang tha zet ah a cang saal. Matthew hi 60-70 kiangkap ih Martyr mi roipi a si.

(10). THADDEUS
Thaddeus hi Phuntan Simon thawn Thuthangṭha an sim tlang, Pathian hna an tuan tlang ih Judea (Israel), Persia (Iran), Samaria (Isael) Idumaea (Jordan kiang), Syria, Mesopotamia (Iran) le Libya pawl ah thuthangṭha a sim, Beirut, Lebanon tla ah a rak sim. Armenia ih thuthangṭha a thlen theinak dingah Bartholomew tla a rak bawm. Jesuh Khrih le thuthangṭha ruangah “hluah le hreitlung” (saw and axe) thawn 72 A.D ah thah a si ih Rome ih St. Peter’s Basilica timi ah phum a si.

(11). PHUNTAN SIMON
Phuntan Simon hi Apostle a si hlanah, Jerusalem ih phuntan (zealots), ram thuhla ah Rome dokalhtu lakih pakhat a si. Middle East, North Africa, Egypt, Mauritania le Britain pawl ah thuthangṭha a sim. A thihnak thu ah sim daan phun hnih a um; Apostle Thaddeus thawn Suanit, Persia ah hluah (saw) thawn an tan timi le, cuih tawk ihsin a luat ih Lincolnshire, Britain ah thinlamtah ah thlai that ti a si. Cutin Khrih le thuthangtha ruangah 74 A.D ah Martyr in a thi.

(12). MATTHIAS
Matthias hi Judas Iscariot aiawh ih hrilmi a si. Ethiopia ih Thuthangṭha simnak ah lungto deen tuar in thinglamtah ah thlaithat a si. A thuhla tampi theih a si lo nan, Jesuh Khrih le thuthangṭha ruangah 70 A.D ah martyr in a thi, Apostles lakih mi ropi pakhat ve a si. (#Hram: Thlarau Lam Thazang Laknak)

Be the first to comment

Leave a Reply

Your email address will not be published.


*