Singapore Hnenum In A Pu Tei Sumpai A Ru Ih iPhone A Lei

Singapore, Serangoon ih um hnenum pakhat in a pu tei sumpai a ru ih nuam a cen hnuah an kai ngah thu theih a si. A pilepu tei in Serangoon ah rawldawr le theiti dawr an nei, Covid-19 ruangah 2020 kum ihsin zarhtin an sumpai laklutmi cu bank ah an ret thei lo ih inn lamah an ret ṭha.

An hnenum cu Indonesia mi a si ih a hmin cu Aryani ti a si. An sumpai ret ṭhanak khan sungah an hnenum cu a lut ṭheu nan rinhlelnak zianghman an nei dah lo. July 2021 ah an sumpai ret ṭhami bag 4 a kim lo, bag 4 sungah sumpai S$11,635.50 zat aum.

Innsang nu in a pasal hnenah a sim ih Aryani cu an rinhlel cuang lo. Anmah in hmun dangah an ret si ding ti ruahnak an nei, an thilzuar mi le sumpai cazin pawl cu kimcang zetin an nei thluh. Cutin, an sumpai retnak bags cu an hawl rero nan an hmu thei nawn lo ruangah an hnenum cu an sut ih zianghman a thei lo thu a sim.

Curuangah thilthleng pawl zingzoi dingah police hnenah an report. August 2021 ah police hnenah an report ih Aryani in a theih veten a ṭih tuk ruangah a sumpai kolmi ṭhenkhat cu sangkate ihsin a hlon. Cumi a hlonmi sumpai cu inntek nu in a hmu ih an zingzoi vivo hnuah Aryani cu an kai.

March 2021 khalah a pu wallet sung ta S$200 zat arak ru zo, a sumpai rukmi ihsin hnipuan mankhung zetzet pawl a lei ih iPhone 12 khal a lei. Cun, Indonesia ih a bank account ah S$3,000 zat arak kuat zo tipawl an theisuak.

October 5, 2021 ah Aryani cu rukru thubuai le pilepu ih rinsannak a siatsuah timi thubuai an orhter ih thla 8 sung thawngtla dingin a thu an ṭhencat. Court in thla 8 sung thawngtla dingin thu a ṭhencat hnuah Aryani in thlakhat sung lawng thawngtla dingin zangfah a dil.

Aryani in “Ka pa in in thihsan zo, innsang cawmtu ka si. Ka naule pathum ih tlawngkainak ding sumpai ka hawl a ṭul. Ka nu leh a damlo ringring ih thlatinten thisen thun a ṭul” a ti. Hnenum in thil a ruk ahcun kum 7 sung thawnthlak le cawhkuanter thei a si nan an zangfak ruangah thla 8 lawng thawngtla ding an timi a si. (#Asia News)

Be the first to comment

Leave a Reply

Your email address will not be published.


*