Kum 25 mi B.I cu South Korea hlasakthiam hminthang a si, a hminngai cu Kim Han-bin a si. 2015 kum ah mipa hlasakthiam pawlkom iKon ah hruaitu a ṭuan, 2019 kum ah an pawlkom ihsin a suak ih amahten mipi pawl a awi ṭheu.
August 27, 2022 ah Philippines khawpi Manila ah ava tlawng ih a mipi (fan) pawl thawn tonawknak an nei. Himi zan ah amah uar zettu fala pakhat hrangah hla a sak. Kum 29 mi Lovely Ann Villagomez cu Philippines fala a si ih B.I hi a atcilh, B.I tong dingih tawlreltu sungtel pakhat a si.
B.I tong ding cu a hngakhlap tuk, puainak hmun ah feh tengteng a tum. Asinan, August 22 zan ah misual kuttuar in a thi, ritheihsii tham in an innsung ah a that ih taklawng in a ruak an hmu. Tualthattu khal palik pawlin an kai zo.
A duhdawt zet mi hlasakthiam B.I tong ngah loin a thih thu cu B.I in a thei ih a hrangah hla a sak. Amai hlaphuah mi ‘Rebirth’ timi hla cu mual liamtu Ann Villagomez hrangah a hlan. B.I in, “Mi pakhat hrangah Rebirth timi hla ka sak ding. A innsang pawl ṭihzah upatnak ah a thuhla cu ka rel tam lo ding” a ti.
A hla thuhla cu “Kan piang sal asilen ka ra lo hawl ding. Caanṭha kan ngah asilen kan tong aw ding” ti a si. Hla a sak thluh hnuah screen tumpi ah “Duhdawtnak thawn van ihsin in rung cuantu Lovely Anne” tin a ngan. A hlasak laiah mipi pawl cu an dai reprep ih ṭhenkhat cu an ṭap.
Kum 24 mi Zia in, “Ka rualnu Anne hrangah cakuat pakhat a si. Khuitawk hmun ih aum asikhallen a riahsia nawn lo ding, ṭih thlaphangnak aum nawn lo ding. Kan thinlung sungah a cam ringring” a ti.
Leave a Reply