Spain Ram Thleng Myanmar Media In “Ka Rualpi Pawlin Ralkap An Do Rero Laiah Hitawk Hmun Ka Rak Thleng Cu Ka Thiam’aw Lo, Asinan…

Kum 30 mi Ko Mratt Kyaw Thu cu media hminthang zet pakhat a si, Yangon ah aum ih ralkap cozah dodal in an sualnak pawl a pholang ringring. AFP in 2017 kum ah Media hlawhtling tin laksawng an rak pe zo.

Myanmar ramsung buainak pawl arak pholang ṭheu ruangah ralkap in kai dingin an hawl. Caan reipi sung a rualpi tei inn ah a relh. Ralkap in an kaihmi pawl cu rapthlak zet zetin an hrem, an that ṭheu ruangah kaih cu a duh lo ih sahimnak hawlin a relh.

Ko Mratt Kyaw Thu in “Innleng ih kedam awn kan theih tikah in ra kai dingah kan ruat ṭheu, ruah nasa zet ih a sur caan khalah ruahsur awn cu meithal awn ih kan rak ruat caan a tam” a ti.

Zankhat cu a rualpi in “Na umnak an lo thei, Yangon na suahsan lohli a ṭul” tin ca a kuat ih Thailand ramri ah a tlan hngal. Ramri ah NGO le tlangpar hriamkai pawlin an rak bawm. Asinan, Thailand ram khalah a him cuang lo ti a theiaw.

Thailand cozah in aum ti a theih asilen Myanmar ramah a kuatsal ding ruangah Europe lamih tlan theidan ding a tawlrel ih Visa a try hnuah a ngah. Cutin, Spain khawpi Madrid ava thleng thei ih an ramsung humhimnak a dil.

Ko Mratt Kyaw Thu in “Thailand ram ka suahsan ih, vanzam sung lawngah malte ka him thlang tin ka hnangam deuh” a ti. A umnak Spain ramah Myanamr ralkap pawl ih an sualzia le mipi pawl an thatdan rapthlak zetzet cu a ausuak rero lai.

Ko Mratt Kyaw Thu in “Kumkhat, kumhnih sung kan do hnuah nehnak kan co ding. Ka rualpi, sibawi le tlawng sayama pawl cu CDM ah lut in ralkap pawl an do rero lai. Culai ah kei cu hitawk ah ka rak um ih ka thiamaw lo zet. Asinan, khatlam ahcun media pawl an kai thluh asilen zoso cangan ding, zoso ausuak ding” a ti.

Be the first to comment

Leave a Reply

Your email address will not be published.


*