Sualnak Neilo An Kaihmi Pacang Cu A Taksa Parih Tattoo Ruangah A Lu Pawp Ko In An Hrem That

Sagaing Region, Monywa Township, Lelzin khua ih tlawnginn cu zo ti theih loin an ur ruangah an khua sungih dalan in ralkap pawl a ko. Khuasung mi pakhat in “Tlawnginn cu a kang nasa lo, an mit lohli thei. Meisa alh khal kan hmu ve man lo” a ti.

Cutin cingin dalan in ‘nauhak pawl tlawngkai an duh lo ruangah tlawnginn an urkang tin ralkap pawl hnenah a sim thei. Monday sunah an khuasung minung 6 an kai, pacang kum 33 mi Zeyar Lin cu nupi fanau nei a si ih tlawnginn kiangih um a nu tei inn ih ava feh lamah ralkap pawlin an rak kai.

An kaihmi midang 5 cu Kyaw Nanda, Aung Aung, Kyaw Myo Htwe, San Min Htet le Ba Chit pawl an si, an umnak le an thuhla cu zohman in an thei lo. Zeyar Lin cu sualnak zianghman anei lo nan a taksa parih tattoo ruangah an hrem that.

A taksa parah Aung San Suu Kyi le a pa Bogyoke Aung San ih zuk a suai ruangah ralkap pawlin nasa zetin an hrem ih a thi. A ruang cu Monywa Public Hospital ah an ret ih a nupi le a innsang pawlin an va la, an hremnak ah a lu dunglam a pawp ih a taksa parah hliamhma nazet an hmu.

Zeyar Lin an kaih sun ah ralkap pawlin khuasung mi 15 cu thu an sut ih an vuak ciamco, an taksa parih hliamhma ruangah zan khal an itthat thei lo ti a si.

Tlawngkai nithum sunah an khuasung ih dalan cu zo ti theih loin that tum in an inn an kap ciamco nan an kap ngah lo, innsung ih rak um a fanu sawn an kap that. Cumi hnuah ralkap 50 hrawng an va thlengsal ih khuasung mi 4 an kai.

An hmuhhmuh an kai ih, an kap ciamco ruangah an khua mipi pawl cu hmun dangah an tlan. Hmun dangih tlan khuasung mi pakhat in “Ralkap pawlin an duhduh an kap ciamco ruangah kan tlan thluh. Ralkap lamtang pawl lawng khua sungah an um lai” a ti.

Be the first to comment

Leave a Reply

Your email address will not be published.


*