Sualnak Neilo, Chin Nauhak 3 An Kai

Ralkap in sualnak neilo, Chin nauhak 3 le an pate an kai. June 24 zinglam nazi 8:00 hrawngah ralkap pawl cu Kalaymyo, Seikanthar lilawn kiangih inn pakhat ah an va lut ih innsung ih um minung 4 an kai.

An kaihmi pathum cu kum kimlo an si, an hmin cu Thang Biek Lien (kum 17), Mang Kim Khuol (kum 16) le Thang Gin Hang (kum 14) pawl an si. An pate Suon Lam Khai (kum 27) khal an kai thotho.

An rualpa in “Ziangruangah an ra kai ti kan thei lo. Ralkap motor ara thleng tikah an tho hrih lo, ihkhun par ta an kai” a ti.

Vengsung mi pakhat in “Nauhak pathum cu kum kimlo an si. June 20 sun ih an kaihmi mino 3 thawn pehtlaih awknak an nei an ti, ziangruang bik ah an kai ti khal kan thei lo” a ti.

June 20 sun ih an kaihmi Maung Kyaw Min Khant Maung cu tuini tiang a innsang pawlin an pehtlaih thei hrih lo ruangah an thinhar zet.

Hringtu a pa in “Tutiang a thuhla kan thei nawn lo, khuitawk ah an ret ti khal kan thei lo. A harhdamnak thuhla ihsin thokin zianghman kan thei lo. Ralkap pawl khalin zianghman in sim lo, rawl khaih le thildang va pek khal an siang lo” a ti.

Be the first to comment

Leave a Reply

Your email address will not be published.


*