Sualnak Neilo Minung 16 Thatnak Ih Tel Ralkap Cu Sui Le Ngun Thawn Ralkap Sakhan Ihsin A Tlansuak Ih Mipi In An Rak Kai

Sagaing, Kani khua ih umhmun khuar ralkap pakhat cu sui le ngun thawn a tlansuak ih July 16 zanah mipi kilhimtu pawlin an rak kai.

Kani khua ih mipi kilhimtu in “Khuasung mi pawlin ralkap pakhat a tlan ti in sim thei ih lamzin ah kan rak kai ngah. Kan check ih 44th Division ih ralkap ṭuanlai a si ti kan thei, a taksa parah sui le ngun, sumpai pawl thawn kan kai. Sui faute 12, suiṭhi 2 le suihnakhaih 1 thawn kan kai” a ti.

Kan dungah ralkap in Kani khuami, sualnak neilo minung 16 an kai ih an vuak, an vel ciamco hnuah an kap that ih an hlawn thilri pawl an laksak thluh. Cutawk ah a telve tin khuasung mipi pawlin an rel nan ralkap in “Ka telve lo” a ti.

An kaihmi ralkap in “No. 1/2019 ah traning kai in ralkap ah ka lut, tu’ahcun 44th Division ah ka um. Hmunhnih ah kan ṭhenaw ih Kani khua le Mingin khua ah umhmun kan khuar, sualnak neilo khuasung mipi pawl kai ih an that caan aum.

Kei cu hmainor tu, hmailam ih um ka si. July 9 sun ah sualnak neilo khuasung minung 16 an thatnak ah ka telve lo. An kah thatnak meithal awn cu ka thei” a ti. Kani ramsung ah ralkap pawl an sual zet ih an duhduh in khausung mipi cu an vuak that ṭheu, an hlawn thilri pawl khal an laksak.

An kaihmi ralkap in “September 2020 ihsin hmainor in ka fehsuak ih inn khal ka tlung hrih lo. Ka innsang pawl thawn thindaiten umtlang ka duh ruangah ralkap ihsin ka tlan.

Sualnak neilo khuasung mipi pawl an that le that lo thuhla cu ralbawi ih thu pek a si, kei cu sualnak neilo mipi pawl that hi ka duh lo, ka tuah duh lo. Nitinten ka hmu ringring ruangah ka hmu thei nawn lo ih ralkap ihsin ka tlan” a ti.

Kani mipi kilhimtu pawlin ṭhaten hmunhimnak ah an ret lai ih an khua ih tlung a duh thu a rel ruangah tlung an siang ding thu khal an sim.

Be the first to comment

Leave a Reply

Your email address will not be published.


*