Sumpai An Neih Lo Ruangah Tlawng Sayama In Tlawnginn Ihsin A Dawisuak Ih A Thataw

Thailand, Songkhla khua ih um nunau tleirawl cu an innsang harsatnak ruangah tlawng a kai ṭha thei lo, an tlawng sayama in tlawnginn ihsin a dawisuak ih a beidong tuk ruangah May 13, 2022 sun ah hridai in a awkaw that.

Kum 14 mi Bonus cu phun 9 kailai a si, Satri Phatthalung School ah tlawng a kai. An inn umnak cu khuapawn deuh ah a si, bus cawlh hmun tiang thlahtu a nei lo ruangah tlawng a kai ṭhiṭha thei lo. Amahten tlawng fehnak ding sumpai an nei lo, pa a nei nawn lo ih a nu thawn an khuasa.

A rualnu in ‘innsang ah harsatnak an nei ih kan tlawng sayama in a kawk ringring’ a ti. Tlawngkainak dingah sumpai an neih lo ruangah a nu thawn an kawkaw ṭheu. An sayama in tlawng a kailonak san cu a theihthiam sak lo ih arak kawk sawn. An sayam in tlawnginn ihsin a dawisuak ih a awkaw that.

A rualnu hnenah a harsatnak pawl a simcia ih ka thih hnuah midang hnenah rung sim theiaw a ti. A rualnu hnenah, “Tlawngkainak ding sumpai kan nei lo. Tlawng fehnak ding sumpai ka nei lo, kikhawitu ka neih lo ruangah kan tlawng sayama in in dawisuak. Ka thinhar tuk ih keimah le keimah thatawk ka duh, ka thi asilen ka thiltonmi cu phuangaw” tin a cah ta.

An tlawng Sayama Gyi in, “Bonus harsatnak hi kan thei zo ih bawm dingin tlawnginn lamin kan tawlrel rero laitak a si. An sayama thawn an hmuthiam aw lo, an theithiamaw lo ruangah siatnak a thleng phah” a ti.

An sayama in, “Ka tlawngta pawl harsatnak pek tum ka si lo, ka theitawkin ka bawm tum sawn a si. Bonus hnenah na nu rung hruai awla, nauhak runinn ah na um ding tin ka fial nan a nunnak a lak thu ka thei” a ti. An tlawng Sayama Gyi in hmailam caan ah an tlawnginn ah hivek thilthleng um nawn lo dingin hmailaknak kan nei. Tuiṭum ih thubuai cu kan zingzoi vivo ding” tin media hnenah a sim.

Be the first to comment

Leave a Reply

Your email address will not be published.


*